डोलप्रसाद अर्याल प्रतिनिधिसभाको सर्वसम्मत सभामुख

काठमाडौँ। रास्वपाका सांसद डोलप्रसाद अर्याल प्रतिनिधिसभाको सभामुखमा सर्वसम्मत निर्वाचित भएका छन्। 

आजको प्रतिनिधिसभाको बैठकको अध्यक्षता गरेका जेष्ठ सदस्य अर्जुननरसिंह केसीले अर्याल सर्वसम्मत रुपमा सभामुखमा निर्वाचित भएको घोषणा गरेका हुन् । 

Watch On

सभामुखमा अर्यालको एकमात्र उम्मेवारी परेको थियो । बैठक सुरु हुनासाथ जेष्ठ सदस्य केसीले अर्यालका प्रस्तावक रवि लामिछानेलाई बोल्न समय दिएका थिए। 

 लामिछानेले डोलप्रसाद अर्याललाई सभामुखमा निर्वाचित गरियोस् भन्ने प्रस्ताव पेस गरे। लामिछानले अर्याललाई सर्वसम्मत गर्न अन्य राजनीतिक दलबाट सहयोग भएको भन्दै धन्यवाद दिए। 

त्यसपछि अर्थमन्त्री स्वर्णिम वाग्ले, कानुनमन्त्री सोविता गौतम, भौतिक पूर्वाधार मन्त्री सुनील लम्सालसहितले लामिछानेको प्रस्तावको समर्थन गरे। 

त्यसक्रममा वाग्लेले डीपी अर्याल सभामुखका लागि उपयुक्त पात्र भएको बताए। उनले सभामुखमा निर्विरोध निर्वाचित हुन सहयोग गरेको भन्दै अन्य दललाई बधाई दिए। 

अर्यालले यसअघिको संसदमा पनि सांसद र मन्त्रीसमेत बनेर आफ्नो क्षमता देखाइसकेको भन्दै अर्याल अनुभवी भएको बताए। ‘उहाँले संसद्को अभिभावक भएर जिम्मेवारीपूर्ण भूमिका निर्वाह हुने विश्वास व्यक्त गर्दछु,’ उनले भने। 

विगतमा सभापति र पार्टीमाथि प्रहार हुँदा अर्याल र आफूले उससभापतिको रुपमा पार्टीलाई हाँकेको स्मरण गरे। मध्यम वर्गीय संघर्षबाट ओलप्रोत भएको जीवन गाथा अर्यालमा रहेको उनले बताए। 

‘तटस्थतामा खरो सावित हुने विश्वास मैले लिएको छु,’ वाग्लेले भने, ‘कुनै दलीय आवद्धता नराखी त्याग गरेर जिम्मेवारी लिनुपर्ने पद हो यो, त्यसमा डीपी अर्याल खरो सावित हुने विश्वास हामीलाई छ।’

कानुनमन्त्री गौतमले अबको संसद् समस्या समाधान उन्मुख हुनुपर्ने बताइन्। ‘अब बहस र भाषणले मात्र नहुने भन्दै बहसहरु जनउत्तरदायी भएर गरिनुपर्छ,’ उनले भनिन्। 

प्रतिनिधिसभाको अर्को बैठक सोमबार दिउँसो १ बजे बस्ने छ । आगामी बैठकको अध्यक्षता नवनिर्वाचित सभामुख अर्यालले गर्नेछन् ।