समाज

आजको मौसमः पूरै देश बादलले ढाक्यो, काठमाडौँसहित अधिकांश स्थानमा वर्षाको सम्भावना

सिधाकुरा

बुधबार, चैत २५, २०८२

आजको मौसमः पूरै देश बादलले ढाक्यो, काठमाडौँसहित अधिकांश स्थानमा वर्षाको सम्भावना

काठमाडौँ । हाल (बुधबार बिहान) गण्डकी, लुम्बिनी, कर्णाली र सुदूरपश्चिम प्रदेशको आकाशमा पूर्णतया बादल लागेको छ भने देशका बाँकी स्थानमा पनि साधारणतया बादल लागेको छ।

अनि बागमती, लुम्बिनी, कर्णाली र सुदूरपश्चिम प्रदेशका थोरै स्थानमा मेघगर्जन/चट्याङसहित हल्का वर्षा भइरहेको मौसम पूर्वानुमान महाशाखाले जनाएको छ।

Watch On

आगामी तीन दिनको मौसम पूर्वानुमान (२०८२ चैत्र २५ देखि २०८२ चैत्र २७) जारी समय: बिहान ०८:०० बजे

महाशाखाले आज बिहान ८ बजे जारी गरेको प्रक्षेपणअनुसार,

दिउँसो : गण्डकी, लुम्बिनी, कर्णाली र सुदूरपश्चिम प्रदेशमा पूर्णतया बादल लाग्ने तथा बाँकी स्थानमा साधारणतया बादल लाग्नेछ। गण्डकी, लुम्बिनी, कर्णाली र सुदुरपश्चिम प्रदेशका धेरै स्थान तथा कोसी र बागमती प्रदेशका पहाडी र हिमाली भूभागका केही स्थान, मधेस प्रदेशलगायत कोसी र बागमती प्रदेशका तराई भूभागका थोरै स्थानमा मेघगर्जन/चट्याङ, हुरी र असिनासहित मध्यम वर्षा/हिमपातको सम्भावना छ। गण्डकी, लुम्बिनी, कर्णाली र सुदूरपश्चिम प्रदेशका पहाडी र हिमाली भूभागका एक-दुई स्थानमा भारी वर्षा/हिमपात हुने सम्भावना छ।

राति : देशभर साधारणतया बादल लाग्नेछ। कोसी, मधेस, बागमती प्रदेशलगायत देशको पहाडी र हिमाली भूभागका केही स्थान तथा बाँकी तराई भूभागका थोरै स्थानमा मेघगर्जन/चट्याङसहित मध्यम वर्षा/हिमपातको सम्भावना छ।