औषधि व्यवस्था विभागका डीजीमाथि छानबिन गर्न प्रधानमन्त्रीको निर्देशन

काठमाडौँ । प्रधानमन्त्री तथा मन्त्रिपरिषद्को कार्यालयले औषधिको मूल्य वृद्धिमा देखिएको विवाद र त्यसमा विभागका महानिर्देशक नारायणप्रसाद ढकालको संलग्नताबारे छानबिन गरी सात दिन भित्र प्रतिवेदन पेस गर्न स्वास्थ्य सचिवलाई निर्देशन दिएको छ ।

प्रधानमन्त्री बालेन्द्र शाहको निर्देशनमा मन्त्रिपरिषदको कार्यालयले स्वास्थ्य सचिवलाई सो निर्देशन दिएको हो ।  प्रधानमन्त्री कार्यालय स्रोतका अनुसार औषधि व्यवस्था विभागका महानिर्देशकले प्रचलित कानूनले तोकेको प्रक्रिया पुरा नगरी औषधिको मुल्य वृद्धि गरेको भन्ने उजुरी परेपछि त्यसबारे छानबिन गरेर सात दिन भित्र प्रतिवेदन पेस गर्न  प्रधानमन्त्री तथा मन्त्रिपरिषद्को कार्यालयले  चैत २६ गते स्वास्थ्य सचिवलाई निर्देशन दिएको हो।

Watch On

‘उजुरीका सम्बन्धमा के कसो भएको हो ? औषधिको मूल्य निर्धारण प्रक्रिया के हो ? उक्त प्रक्रिया पुरा गरी काम भएको हो होइन ? औषधिको मूल्य निर्धारण प्रक्रियामा अनियमिता भएको भए को कसको संलग्नातामा भएको हो ? सो समेतको सम्पूर्ण विषय समेत खुलाउने गरी विषयविज्ञको संलग्नतामा तीन सदस्यीय छानबिन समिति गठन गर्न निर्देशन दिइएको छ।’ प्रधानमन्त्री कार्यालय स्रोतले भन्यो ।

उक्त उजुरीपछि औषधि व्यवस्था विभागका महानिर्देशक नारायणप्रसाद ढकाललाई चैत २६ गते नै स्वास्थ्य तथा जनसंख्या मन्त्रालयमा तानिएको छ ।

औषधि उत्पादक तथा व्यवसायीसँगको मिलेमतोमा औषधिमा चर्को मूल्य वृद्धि गरिएको भन्दै आलोचना भइरहेको छ । यसबारेमा दुई दिनअघि रास्वपा सांसद राजीव खत्रीले संसदमै कुरा उठाएका थिए ।