रुविकुमारी ठाकुर उपसभामुख निर्वाचित

काठमाडौँ । प्रतिनिधिसभाको उपसभामुखमा श्रम संस्कृति पार्टीकी सांसद रुविकुमारी ठाकुर निर्वाचित भएकी छन् ।

आज बसेको प्रतिनिधिसभाको बैठकबाट रुवि उपसभामुखमा निर्वाचित भएकी हुन् । २५ वर्षीया समानुपातिक सांसद रुविकुमारी सत्तारुढ राष्ट्रिय स्वतन्त्र पार्टी (रास्वपा) को समर्थनमा उपसभामुख निर्वाचित भएकी हुन् ।

Watch On

उपसभामुखमा राप्रपाले समानुपातिक सांसद सरस्वती लामालाई उम्मेदवार बनाएको थियो । अन्तिमसम्म कुनै पनि उम्मेदवारले उम्मेदवारी फिर्ता नलिएपछि सभामुख डीपी अर्यालले मत विभाजन गराएका थिए ।

सुरुमा सभामुख डीपी अर्यालले सरस्वती लामालाई उपसभामुख निर्वाचित गरियोस् भन्ने प्रस्तावलाई निर्णयार्थ प्रस्तुत गर्दै मत विभाजन गराएका थिए । मत विभाजनका क्रममा २ सय ५७ सांसद सहभागी भएकोमा लामाको पक्षमा जम्मा ५ र विपक्षमा २ सय १५ मत परेपछि सभामुख अर्यालले सरस्वती लामालाई सभामुखमा निर्वाचित गरियोस् भन्ने प्रस्ताव बहुमतले अस्वीकृत भएको घोषणा गरे ।

त्यसपछि सभामुख अर्यालले रुविकुमारी ठाकुरलाई उपसभामुखमा निर्वाचित गरियोस् भन्ने प्रस्तावलाई निर्णयार्थ प्रस्तुत गर्दै मत विभाजन गराएका थिए ।

मत विभाजन हुँदा  २ सय ५६ सांसद सहभागी भएकोमा रुविको पक्षमा २२९ मत र विपक्षमा ५ मत खस्यो । त्यस्तै मत दिन्न भन्नेमा २२ मत खसेको थियो । मत विभाजनको परिणामसँगै सभामुख अर्यालले बहुमतले रुविकुमारी ठाकुर उपसभामुख निर्वाचित भएको घोषणा गरे । उनले नवनिर्वाचित उपसभामुख रुविकुमारीलाई बधाई पनि दिए ।

त्यसअघि बैठकमा राप्रपा उम्मेदवार सरस्वती लामाका प्रस्तावक तथा समर्थकले रास्वपाले धोका दिएको आरोप लगाएका थिए । राप्रपा संसदीय दलका नेता ज्ञानेन्द्र शाहीले रास्वपा नेतृत्वसँग सल्लाह गरेर नै राप्रपाले उम्मेदवारी दिएको तर, केहीबेरमै रास्वपाले बोली फेरेको आरोप लगाए ।

तर, रुविलाई समर्थन गरेको रास्वपाका नेताहरुले भने पछिल्लो जनमतको कदर गर्दै रुविलाई समर्थन गरिएको जवाफ दिए । उनीहरुले प्रतिनिधिसभामा प्रतिनिधित्व गर्ने दलहरुसँग सहकार्य गर्ने थुप्रै ठाउँहरु रहेको भन्दै चित्त नदुखाउन आग्रह गरे ।