अस्पतालमा विपन्नका लागि १० प्रतिशत निशुल्क शय्या सुनिश्चित गर्ने पोर्टल सार्वजनिक, यसरी हेर्नुहोस् विवरण

काठमाडौँ । सरकारले निःशुल्क उपचार गर्नुपर्ने बिरामीका लागि वेबसाइट सञ्चालनमा ल्याएको छ । 

 सरकारले सञ्चालनमा ल्याएको ‘फ्री हेल्थ पोर्टल’ यो https://freehealth.mohp.gov.np/ हो ।  

Watch On

अब बिरामीले यो पोर्टलबाट अस्पतालले विपन्न, असहाय र बेवारिसे बिरामीका लागि छुट्टाएका १० प्रतिशत शय्याको जानकारी लिन सक्छन् । 

पोर्टलमा लगइन गरेर कूल शय्याको सङ्ख्या, निःशुल्क शय्याको सङ्ख्या, तत्काल बिरामीले प्रयोग गरिरहेका निःशुल्क शय्या, खाली रहेका निःशुल्क शय्या र प्रदेश तथा अस्पतालगत विवरण लाइभ हेर्न सक्छन् । 

पोर्टलमा हालसम्म १५ वटा अस्पतालले आफ्नो कूल शय्याको १० प्रतिशत निःशुल्क उपलब्ध गराउने सम्पूर्ण विवरण यस पोर्टलमा समावेश गरिसकेका छन् ।

साथै अस्पतालले निःशुल्क शय्या उपलब्ध नगराएमा अनलाइनबाटै सेवाग्राहीले उजुरी गर्न सक्ने छन् । 

बालेन नेतृत्वको नयाँ सरकारले स्वास्थ्य सेवालाई प्रविधिमार्फत पारदर्शी र पहुँचयोग्य बनाउन मन्त्रिपरिषद्को पहिलो बैठकबाट स्वीकृत १०० बुँदे ‘शासकीय सुधार कार्यसूची’ मा स्वास्थ्य क्षेत्र सुधारका लागि ३० दिनभित्र ‘फ्री हेल्थ पोर्टल’को निर्माण गर्ने घोषणा गरेको थियो । घोषणा गरेको २० दिनमै ‘फ्री हेल्थ पोर्टल’ निर्माण पुरा भएको छ ।

कानुनीरुपमा विपन्न, असहाय र बेवारिसे बिरामीका लागि १० प्रतिशत शय्या छुट्टाउनु पर्ने व्यवस्था गरे पनि प्रभावकारी कार्यान्वयन नहुँदा आर्थिक अभावकै कारण नागरिकले उपचार नपाउने अवस्था थियो ।

कानुनमै भएको व्यवस्थालाई कार्यान्वयन गराउँदै सरकारी तथा निजी दुवै अस्पतालको रियल टाइम (लाइभ) अनुगमन गर्न यो सरकारले ‘फ्री हेल्थ पोर्टल’ सञ्चालनमा ल्याएको जनाइएको छ । 

नेपालको संविधान २०७२ को धारा ३५ ले प्रत्येक नागरिकलाई राज्यबाट आधारभूत स्वास्थ्य सेवा निःशुल्क प्राप्त गर्ने र आकस्मिक स्वास्थ्य सेवाबाट वञ्चित नगरिने संवैधानिक हकको व्यवस्था गरेको छ । 

यसै गरी नेपाल सरकारको स्वास्थ्य संस्था सञ्चालन मापदण्ड २०७७ को दफा ७० (घ) मा अस्पतालमा उपचारका लागि आउने विपन्न, असहाय र बेवारिसे बिरामीका लागि कूल शय्याको १० प्रतिशत छुट्टाई अनिवार्य रूपमा निःशुल्क उपचार उपलब्ध गराउनुपर्ने व्यवस्था छ ।

कसरी काम गर्छ ?

सर्वसाधारणले यस पोर्टलमा लगइन गरेर कूल शय्याको सङ्ख्या, निःशुल्क शय्याको सङ्ख्या, तत्काल बिरामीले प्रयोग गरिरहेका निःशुल्क शय्या, खाली रहेका निःशुल्क शय्या र प्रदेश तथा अस्पतालगत विवरण लाइभ हेर्न सक्छन् । 

अस्पतालहरूले  स्वास्थ्य व्यवस्थापन सूचना प्रणाली (HMIS) को वेब ठेगाना (hmis.gov.np/hmis)  मा गई आफूलाई उपलब्ध गराइएको DHIS2  को युजरनेम र पासवर्ड प्रयोग गरेर विवरण भर्नुपर्छ । तयार पारिएको म्यानुअलअनुसार अस्पतालहरूले 'Hospital Information' अन्तर्गत अस्पतालको प्रकार, स्वीकृत शय्या, निःशुल्क शय्या र सम्पर्क व्यक्तिको फोन नम्बर जस्ता विवरण अद्यावधिक गर्नुपर्छ ।

त्यस्तै'Free Health Service Status' मार्फत निःशुल्क उपचार पाउने बिरामीको परिचयपत्रको प्रकार, परिचय नम्बर, नाम, लिङ्ग, फोन नम्बर, आकस्मिक सम्पर्क नम्बर, भर्ना भएको मिति, बेड नम्बर, विभाग र रोगको निदान जस्ता विवरण भर्नुपर्छ । साथै पारदर्शीताका लागि स्थानीय तह वा वडाको सिफारिस पत्रसमेत अनिवार्य रूपमा स्क्यान गरी अपलोड गर्नुपर्ने व्यवस्था गरिएको छ ।