अनाधिकृत पत्र लेखेर रेशम चौधरीलाई पक्राउ गराउने महिमानसिंह विष्टलाई ६ महिना कैद र १० हजार जरिवाना

काठमाडौँ । सर्वोच्च अदालतमा कार्यरत रहँदा अनधिकृत पत्र लेखेका महिमानसिंह विष्टलाई ६ महिना कैद र १० हजार रुपैयाँ जरिवानाको सजाय तोकिएको छ । 

जिल्ला अदालत काठमाडौंका न्यायाधीश खिमानन्द भुषालको इजलासले बिहीबार उनलाई ६ महिना कैद सजाय तोकेको हो । 

Watch On

जिल्ला अदालत काठमाडौंका न्यायाधीश खिमानन्द भुषालको इजलासले बिहीबार उनलाई ६ महिना कैद सजाय तोकेको शाखा अधिकृत हेमन्त भट्टराईले जानकारी दिए।

विष्ट चैत २२ गते दोषी ठहर भएका थिए । उनी सर्वोच्च अदालतमा शाखा अधिकृत पदमा कार्यरत थिए ।  गत वैशाख १७ उनले लेखेको पत्रका आधारका नागरिक उन्मुक्ति पार्टी नेपालका संरक्षक रेशमलाल चौधरी पक्राउ परेका थिए । 

चौधरी पक्राउ परेको दिन नागरिक उन्मुक्ति पार्टी सिके राउत नेतृत्वको जनमत पार्टीको एकता घोषणा कार्यक्रम थियो । कार्यक्रम सुरु हुनुभन्दा ठिक अगाडी चौधरी पक्राउ परेपछि एकता नै तोडिएको थियो । यो विषयले राजनीतिक क्षेत्रमा ठूलै तरंग ल्याएको थियो । 

चौधरी पक्राउ परिसकेपछि सर्वोच्चबाट आएको पत्र अनाधिकृत रहेको प्रहरीले चाल पाएको थियो । त्यसपछि सर्वोच्च अदालत प्रशासनले  उक्त पत्र अनधिकृत भएको भन्दै महिमानसिंह विष्टमाथि अनुसन्धान गर्न माग गरेको थियो ।

त्यसपछि प्रहरीले विष्टलाई नियन्त्रणमा लिएर लिखत सम्बन्धी कसुरमा अनुसन्धान गरेको थियो ।