सुकुम्वासीका सामान ढुवानी गर्न सुरक्षा निकायले सघाउने, १५ दिनभित्र बसोबासको उचित प्रवन्ध गर्ने

काठमाडौँ । जिल्ला प्रशासन कार्यालय काठमाडौँले नदि किनारमा बस्दै सुकुम्बासीका लागि ६ बुँदे सूचना जारी गरेको छ । उक्त सूचनामा आज साँझ ७ बजेभित्र अवैध रुपमा बनाइएका घर टहराहरु खाली गर्न भनिएको छ । 

सूचनामा घर टहरामा भएका सामानहरु आफैँले सार्न नसक्ने अवस्था भए प्रशासनले ढुवानीको लागि सहजीकरण गरिदिने उल्लेख छ । ‘आफैले सार्न नसक्ने अवस्थामा महानगरीय प्रहरी, नेपाल प्रहरी र सशस्त्र प्रहरीलाई खबर गर्नुहोला । सुरक्षाकर्मीले आवश्यक ढुवानीको प्रवन्ध मिलाउनेछ ।’ सूचनामा भनिएको छ । 

Watch On

वैशाख १२ गते बिहान ६ बजेदेखि घर टहराहरू भत्काउने र अतिक्रमित जग्गा पूर्ण रुपमा खाली गर्ने कार्य हुने त्यस कार्यमा कोही कसैले बाधा व्यवधान सिर्जना गर्ने कार्य गरेमा कानुनबमोजिम कडा कारबाही हुने उल्लेख छ । 

नदि किनारबाट उठाइएका सबै व्यक्ति तथा परिवारलाई सरकारले तोकेका विभिन्न बसोबासको आधारभूत न्यूनतम सुविधा प्राप्त स्थानहरुमा राखिने र आगामी १० देखि १५ दिनभित्र एकिन भएका वास्तविक भूमिहीनलाई बसोबासको उचित प्रबन्ध गर्ने गरी तयारी भइरहेको सूचनामा उल्लेख छ । 

यस्ता छन् काठमाडौँ प्रशासनले जारी गरेको सूचनाका ६ बुँदाहरु 

१‍. यसरी अवैध रूपमा बनाइएका घर टहराहरू मिति २०८३ वैशाख ११ गते साँझ ७ : ०० बजे भित्रमा खाली  गर्नुहोला । आफैले सार्न नसक्ने अवस्थामा महानगरीय प्रहरी, नेपाल प्रहरी र सशस्त्र प्रहरीलाई खबर गर्नुहोला । सुरक्षाकर्मीले आवश्यक ढुवानीको प्रवन्ध मिलाउनेछ।

२.  यस्ता घर टहराहरूमा भएका आफ्ना निजी सरसामानहरू, लत्ता कपडा, घरपालुवा पशु पंक्षी सुरक्षित स्थानमा तत्काल सार्ने व्यवस्था गर्नुहोला। 

३. घर टहराहरूमा बसोबास गर्ने अपाङ़ग, साना बालबालिका, गर्भवती, सुत्केरी, वृद्धवृद्धा एवं बिरामी व्यक्तिहरूलाई प्राथमिकता दिई अन्यत्र सार्ने काम गर्नुहोला। यस कार्यका लागि काठमाडौं महानगरीय प्रहरी, नेपाल प्रहरी
र सशस्त्र प्रहरी बलको समेत मद्दत लिनुहोला।

४.  मिति २०८३ वैशाख १२ गते बिहान ६:०० बजेदेखि घर टहराहरू भत्काउने र अतिक्मित जग्गा पूर्ण रुपमा खाली गर्ने कार्य हुनेछ। त्यस कार्यमा कोही कसैले बाधा व्यवधान सिर्जना गर्ने कार्य गरेमा कानुनबमोजिम कडा कारबाही भई जानेछ। यस स्थानबाट उठाइएका सबै व्यक्ति तथा परिवारलाई सरकारले तोकेका विभिन्न बसोबासको आधारभूत न्यूनतम सुविधा प्राप्त स्थानहरुमा राखिनेछ।

५. तपाईहरुलाई सुरक्षित रुपमा बसोबासको व्यवस्था भएपछि नेपाल सरकारका सम्बन्धित मन्त्रालय तथा अन्य अधिकार प्राप्त निकायबाट वास्तविक भूमिहीन सुकुम्बासीहरूको लगत लिने र स्क्रिनिडको कार्य तत्काल सुरु
हुनेछ ।

६. आगामी १० देखि १५ दिनभित्र एकिन भएका वास्तविक भूमिहीनलाई बसोबासको उचित प्रबन्ध गर्ने गरी तयारी भइरहेको छ। यस कार्यका लागि तपाईहरुले सहयोग गर्नुहोला।