प्रधानमन्त्रीले सञ्चारकर्मीलाई आफ्नो भिडियो खिच्न रोक्नु भएको छैन,अतिरञ्जित नगर्नु: प्रधानमन्त्रीको सचिवालय

काठमाडौँ । प्रधानमन्त्री बालेनले कुनै पनि सञ्चारकर्मीलाई कार्यक्षेत्रबाट हटाउन वा आफ्नो भिडियो खिच्न रोक्न निर्देशन नदिएको सचिवालयले जनाएको छ । 

प्रधानमन्त्री कार्यालयमा परिसरमा सञ्चारकर्मीलाई भिडियो खिच्ने अवरोध गरिएको भन्ने विषयमा समाचार सार्वजनिक भएपछि प्रधानमन्त्रीको सचिवालयले ध्यानाकर्षण भएको उल्लेख गर्दै प्रधानमन्त्रीले सञ्चारकर्मीसँग सम्बन्धित कुनै निर्देशन नदिएको जनाएको हो। 

Watch On

प्रधानमन्त्रीको सचिवालयले घटनाक्रमको जानकारी गराउँदै प्रधानमन्त्री बालेन कार्यालय प्रवेश गर्ने क्रममा सुरक्षाकर्मीसँग परिसरभित्रको सवारी व्यवस्थापन र प्रशासनिक सहजतासँग मात्र सम्बन्धित विषयमा कुरा गरेको जनाएको हो । 

प्रधानमन्त्रीको सचिवालयका अनुसार प्रधानमन्त्रीले सञ्चारकर्मीहरूलाई कार्यक्षेत्रबाट हटाउन वा आफ्नो भिडियो खिच्न रोक्न कुनै पनि किसिमको निर्देशन दिएका छैनन् । 

प्रधानमन्त्री कार्यालय प्रवेश गर्ने क्रममा कार्यालय परिसरमा सवारी साधनहरूको अत्यधिक भिडभाड देखिएपछि उहाँले सोको व्यवस्थापन र सुरक्षा सतर्कताबारे सुरक्षाकर्मीसँग सामान्य जिज्ञासा मात्र राख्नुभएको हो, प्रधानमन्त्रीको सचिवालयले भन्यो  उहाँको यो चासो परिसरभित्रको सवारी व्यवस्थापन र प्रशासनिक सहजतासँग मात्र सम्बन्धित थियो। 

साथै सञ्चारकर्मीहरूलाई प्रधानमन्त्री कार्यालय परिसरमा उपलब्ध गराइएको पहुँचमा कुनै पनि प्रकारको कटौती वा निषेध समेत नगरिएको सचिवालयले जनाएको छ । 
प्रधानमन्त्रीका प्रेस विज्ञ दिपा दाहालले सञ्चारकर्मीहरूलाई सूचना सङ्कलन र रिपोर्टिङका लागि अनुमति भएको स्थानमा कुनै पनि किसिमको अवरोध नभएका र भविष्यमा समेत नहुने जनाएकी छिन् । 

उनले सुरक्षा र व्यवस्थापनसँग जोडिएको सामान्य प्राविधिक विषयलाई प्रेसमाथिको 'अङ्कुश'वा'अवरोध'का रूपमा अतिरञ्जित नगर्न अनुरोध समेत गरेकी छिन् ।