रास्वपा सांसद जगदीश खरेलले भने– म माथि मिडिया ट्रायल भयो

काठमाडौँ । पूर्वसञ्चारमन्त्री एवम् रास्वपा सांसद जगदीश खरेलले आफूमाथि मिडिया ट्रायल भएको भन्दै त्यसविरुद्ध कानुनी उपचार खोज्ने बताएका छन् ।

केही दिनयता, केही सञ्चारमाध्यम र सामाजिक सञ्जालमा स्मार्ट टेलिकमसँग जोडेर पूर्वसञ्चारमन्त्री खरेलको आलोचना भइरहेको छ ।

Watch On

केही दिनदेखि स्विट्जरल्याण्डमा रहेका खरेलले आफूमाथि उठेका विषयलाई लिएर आज सामाजिक सञ्जालमा संक्षिप्त जवाफ दिएका छन् । उनले भनेका छन्– अहिले म माथि मिडिया ट्रायल भएको छ। केही सञ्चारमाध्यम तथा सामाजिक सञ्जालमा मेरो नाम जोडेर नियोजित रुपमा फेक न्युज फैलाइएको छ ।’

उनले भ्रामक, नियोजित तथा कपोलकल्पित प्रहारले आफ्नो चरित्र र राजनीतिक भविष्यमाथि प्रहार गर्छु भनेर नसोच्न पनि चेतावनी दिएका छन् । आफूले कुनै गल्ती नगरेको बताउँदै सांसद खरेलले आफूविरुद्ध फैलाइएका अफवाहविरुद्ध कानुनी उपचार खोज्ने पनि चेतावनी दिएका छन् ।

यस्तो छ उनको संक्षिप्त जवाफ
प्रिय शुभचिन्तकहरु,
अहिले म माथि मिडिया ट्रायल भएको छ । केही सञ्चारमाध्यम तथा सामाजिक सञ्जालमा मेरो नाम जोडेर नियोजित रूपमा ‘फेक न्युज’ फैलाइएको छ । कृपया भ्रममा नपर्नु होला । अहिले म कार्यक्रमको सिलसिलामा  स्विजरल्याण्डमा छु । गल्ती गरेको छैन । त्यसैले अलिकति पनि डर छैन । सोधे हुन्छ, खोजे हुन्छ, तर सत्य सत्य नै हुन्छ । मेरो इमान नै मेरो गन्तब्यको लागि प्रयाप्त छ । यस्ता भ्रामक, नियोजित तथा कपोल्कल्पित प्रहारले मेरो चरित्र र राजनीतिक भविष्यमाथी प्रहार गर्छु भनेर नसोचे हुन्छ । बाँकी कानूनी उपचार खोज्ने छु।