गाजामा भोकमरी र विस्थापनको सङ्कट गहिरिँदै

संयुक्त राष्ट्रसङ्घको मानवीय सहायता समन्वय निकायका अनुसार गाजामा रहेका २१ लाख मानिसहरू अहिले पनि गाजा क्षेत्रको आधाभन्दा कम भूभागमा सीमित भएर बस्न बाध्य छन् ।

संयुक्त राष्ट्रसङ्घले जनाएको अनुसार मानिसहरूले गाजाका धेरै भागहरूमा पहुँच पाउन सकेका छैनन्, जहाँ खेतीयोग्य जमिन र अत्यावश्यक पूर्वाधारहरू रहेका छन् । उनीहरू विदेश जान वा विशेष स्वास्थ्य सेवा उपलब्ध हुने पश्चिमी किनारा क्षेत्रमा पुग्न समेत असमर्थ छन् । मानवीय सहायता निकायहरूले कठिन परिस्थितिका बीच पनि राहत वितरण जारी राखेका छन् ।

Watch On

गत साता करिब ५ हजार ओछ्यान सामग्री, ६ सय शय्या सामग्री किट, १ हजार ५ सयभन्दा बढी अस्थायी आवास सामग्री र झण्डै ५५० वटा पाल चार हजार चार सयभन्दा बढी परिवारलाई वितरण गरिएको बताइएको छ । खाद्य सुरक्षासम्बन्धी साझेदार संस्थाहरूले दैनिक ११ लाखभन्दा बढी खाना १२० भन्दा बढी सामुदायिक भान्सामार्फत उपलब्ध गराइरहेका छन् । तर पनि गाजामा भोकमरीको समस्या अझै गम्भीर रहेको बताइएको छ ।

संयुक्त राष्ट्रसङ्घको खाद्य सहायता निकायका अनुसार धेरै परिवार अझै खाद्य सहायतामै निर्भर छन्, किनभने ताजा खाद्यान्न अत्यन्त महँगो छ । प्रत्येक पाँचमध्ये एक परिवारले दिनमा केवल एकपटक मात्र खाना खाने गरेको जनाइएको छ । खाना पकाउने ग्यासको अभावका कारण करिब ७० प्रतिशत परिवारले फोहोर जलाएर वा असुरक्षित तरिकाबाट खाना पकाउन बाध्य भएको बताइएको छ ।

त्यस्तै, पश्चिमी किनारा क्षेत्रमा पनि बस्ती विस्थापनको समस्या जारी छ। बसोबास गर्ने समुदायमाथि आक्रमण र धम्की बढेपछि पछिल्लो एक सातामा ३० भन्दा बढी मानिस विस्थापित भएका छन् । सन् २०२३ यता पश्चिमी किनारा क्षेत्रमा हिंसाका कारण ५ हजार ९ सयभन्दा बढी प्यालेस्टिनी विस्थापित भइसकेका छन्, जसमा यस वर्ष मात्रै करिब २ हजार जना रहेका छन् ।