प्रतिनिधिसभामा आज ६ वटा कार्यसूची, अर्थमन्त्रीले विनियोजन विधेयकका सिद्धान्त र प्राथमिकता पेस गर्ने

काठमाडौँ । प्रतिनिधिसभाको बैठकमा आज ६ वटा कार्यसूची रहेका छन् ।

बिहान ११ बजे बस्ने बैठकमा सुरुमा नीति तथा कार्यक्रममाथि छलफल गर्ने पहिलो कार्यसूची छ ।

Watch On

यस्तै दोस्रो कार्यसूची नीति तथा कार्यक्रममाथिको छलफलमा उठेका प्रश्नहरूको जवाफ दिने छ ।
कार्यसूचीमा प्रधानमन्त्री वालेन्द्र शाहले जवाफ दिने उल्लेख गर्दै भनिएको छ, ‘प्रधानमन्त्री वालेन्द्र शाहले सम्माननीय राष्ट्रपतिले २०८३ वैशाख २८ गते सोमबार संघीय संसद्को दुवै सदनको संयुक्त बैठकमा गर्नुभएको सम्बोधनमा उल्लिखित आ।व। २०८३÷०८४ को नेपाल सरकारको वार्षिक नीति तथा कार्यक्रममाथिको छलफलको क्रममा उठेका प्रश्नहरूको जवाफ दिनुहुने’ ।

तर, प्रधानमन्त्री शाहले भने यस अघिनै जवाफका लागि अर्थमन्त्री डा.स्वर्णिम वाग्लेलाई तोकेका कारण आजको बैठकमा पनि जवाफका लागि डा.वाग्लेनै उपस्थिती हुने जनाइएको छ । 

प्रधानमन्त्रीले अर्को मन्त्रीलाई समेत जवाफ दिन पठाउन सक्दछन् । यही अधिकार प्रयोग गरेर उनी बुधबार प्रतिनिधिसभाको बैठकमा गएका थिएनन् । विपक्षी दलहरूले प्रधानमन्त्रीको उपस्थिति अनिवार्य हुनुपर्ने भनेपछि बैठक कार्यसूचीमा प्रवेश गर्न सकेको थिएन ।

राष्ट्रपति रामचन्द्र पौडेलले यही वैशाख २८ गते सोमबार संघीय संसद्को दुवै सदनको संयुक्त बैठकमा आर्थिक वर्ष २०८३/०८४ को लागि नेपाल सरकारले तयार पारेको वार्षिक नीति तथा कार्यक्रम प्रस्तुत गरेका थिए ।

यसउपर प्रतिनिधिसभामा छलफल हुन पाएको छैन । बुधबार छलफल गर्ने कार्यसूची रहे पनि विपक्षी दलहरूको बारम्बारको अवरोधका कारण आजको बैठक तोकिएको थियो । 

यस्तै तेस्रो कार्यसूचीमा नेपाल सरकारको वार्षिक नीति तथा कार्यक्रममाथि प्राप्त संशोधनहरूलाई निर्णयार्थ प्रस्तुत गर्ने रहेको छ ।

चौथो कार्यसूचीमा सभामुखले नेपाल सरकारको वार्षिक नीति तथा कार्यक्रमलाई निर्णयार्थ प्रस्तुत गर्ने उल्लेख गरीएको छ ।

पाँचौं कार्यसूचीमा अर्थमन्त्री डा.स्वर्णिम वाग्लेले विनियोजन विधेयकका सिद्धान्त र प्राथमिकता पेस गर्ने रहेको छ ।

जस अन्तर्गत भनिएको छ, ‘अर्थमन्त्री डा.स्वर्णिम वाग्लेले “आ.व. २०८३/०८४ को लागि विनियोजन विधेयकका सिद्धान्त र प्राथमिकता सम्बन्धमा (कर प्रस्ताव बाहेक) माथि छलफल गरियोस्“ भनी प्रस्ताव प्रस्तुत गर्नुहुने ।’

छैठौं कार्यसूचीमा प्रतिनिधि सभा नियमावली मस्यौदा समितिका सभापति गणेश पराजुलीले ‘प्रतिनिधिसभा नियमावली मस्यौदा समितिको प्रतिवेदन, २०८३’ माथि विचार गरियोस् भन्ने प्रस्ताव प्रस्तुत गर्ने विषय रहेको छ ।