हिरासतमा युवकको मृत्युः प्रहरी निरीक्षकसहित २ जनालाई कारबाही सिफारिस

काठमाडौँ । सिन्धुलीमा प्रहरी हिरासतमा एक युवकको मृत्यु भएको घटनामा प्रहरी निरीक्षकसहित २ जनालाई कारबाही गर्नुपर्ने सिफारिससहितको प्रतिवेदन प्रहरी प्रधान कार्यालयमा पेश भएको छ ।

प्रहरी प्रधान कार्यालयले गठन गरेको छानबिन समितिले इलाका प्रहरी कार्यालय खुर्कोटका प्रहरी निरीक्षक वसन्त भुजेल र घटना भएको दिन हिरासत कक्षमा ड्युटीमा रहेका प्रहरी कर्मचारीलाई विभागीय कारबाही गर्न सिफारिस गरेको एक सदस्यले जानकारी दिएका छन् ।

Watch On

सिन्धुलीको खुर्कोटस्थित इलाका प्रहरी कार्यालयको हिरासतमा राखिएका श्रीकृष्ण बिकको मृत्यु भएपछि डीआईजी दिनेश आचार्यको नेतृत्वमा छानबिन समिति बनेको थियो । समितिले प्रहरी महानिरीक्षक दानबहादुर कार्कीलाई प्रतिवेदन बुझाएको हो । उक्त प्रतिवेदनलाई प्रहरी प्रधान कार्यालयले गृहमन्त्रालयमा पठाएको छ ।

सिन्धुलीको सुनकोशी गाउँपालिका वडा नम्बर–३ स्थित जुम्लिडाँडाका २३ वर्षीय श्रीकृष्ण बिकलाई वैशाख ३ गते ललितपुरमा पक्राउ गरी सिन्धुली पठाइएको थियो ।

इलाका प्रहरी कार्यालय खुर्कोटमा हिरासतमा राखिएका बिक वैशाख ७ गते साँझ हिरासतको शौचालयमा आफैंले लगाएको सर्टको पासो लगाएर झुन्डिएको प्रहरीको दाबी छ । तर, बिकका आफन्त र राष्ट्रिय स्वतन्त्र पार्टीका सांसद खगेन्द्र सुनारलगायतले उनको हत्या गरिएको दाबी गरिरहेका छन् ।

छानबिन समितिले भने श्रीकृष्णको मृत्यु ‘झुन्डिएर नै भएको’ निष्कर्ष सहितको छानबिन प्रतिवेदन बुझाएको  जनाइएको छ ।