आफ्नो मुद्दा तत्काल टुङ्गाउने सहित ५ बुँदे सहमतिपछि रूबी खानले तोडिन अनशन

काठमाडौँ । विभिन्न माग राखेर २३ दिनदेखि अनशन बसेकी रूबी खान र सरकारका प्रतिनिधिबिच मङ्गलवार ५ बुँदे सहमति भएको छ। 

सहमति भएसँगै उनले पानी पिएर २३ औँ दिनको अनशन अन्त्य गरेकी छिन् । 

Watch On

खानलाई प्रधानमन्त्री बालेनका प्रेस तथा अनुसन्धान विज्ञ दिपा दाहालले पानी खुवाएर अनशन तोडाएकी हुन् । 

बाँकेको नेपालगन्जस्थित सञ्जीवनी कलेज अफ मेडिकल साइन्सेज (नेपालगन्ज अस्पताल)को क्याबिनमा अनशनरत खानसँग वार्ताका लागि सरकारका तर्फबाट दाहालसहित प्रहरी अतिरिक्त महानिरीक्षक सुशिल सिंह राठौर, गृह मन्त्रालयबाट सहसचिव आनन्द काफ्ले बाँके पुगेका थिए । 

उक्त टोलीले सोमबारदेखि खानसँग वार्ता गरेको थियो । आज सहमतीभएपछि गृह मन्त्रालयका सहसचिव र खानबिच सहमति पत्रमा हस्ताक्षर भएको छ ।

वार्ता टोलीका अनुसार जिल्ला प्रहरी कार्यालय, बाँकेमा २०७७ चैत २० गते दर्ता भएको निर्मला कुर्मीको अपहरण, शरीर बन्धक र कर्तव्य ज्यान सम्बन्धी मुद्दाका सम्बन्धमा हालसम्म भएका अनुसन्धानको अध्ययन गरी यथाशीघ्र न्यायिक प्रक्रियामा लैजाने सहमति भएको छ। 

त्यस्तै, अनशनरत  खानले उठाएका अन्य घटनाका अनुसन्धानका सम्बन्धमा लुम्बिनी प्रदेश प्रहरी कार्यालय, दाङबाट छानबिन गराउने र त्यस क्रममा कमजोरी पाइएमा सम्बन्धित प्रहरी कर्मचारीहरू उपर प्रहरी नियमावली बमोजिम कानुनी कारबाही गर्ने सहमति भएको छ । 

साथै खानविरुद्ध जिल्ला प्रहरी कार्यालय, बाँकेमा दर्ता भएको सार्वजनिक शान्ति विरुद्धको कसुर मुद्दा माथिको अनुसन्धानलाई पनि तत्काल टुङ्ग्याउन निर्देशन दिने सहमति भएको छ। 

​यसैगरी, निर्मला कुर्मीको न्यायका लागि आन्दोलनरत  खान र अन्य महिला अधिकारकर्मीहरूको सुरक्षाका लागि बाँकेस्थित जिल्ला प्रहरी कार्यालय र जिल्ला प्रशासन कार्यालयलाई आवश्यक निर्देशन दिने सहमति भएको छ।