हाम्रो अर्थतन्त्रको अवस्था निदाउँदा पनि ऋण लिनुपर्नेमा छौँ: अर्थमन्त्री वाग्ले

काठमाडौँ । नेपालको वर्तमान आर्थिक अवस्था हेर्दा नेपाली जनताले निदाउनकै लागि पनि ऋण लिनु पर्ने भएको अर्थमन्त्री डा. स्वर्णिम वाग्लेले बताएका छन्।

सरकारले हालै लग्न लागेको वैदेशिक ऋणका विषयमा संशय फैलाएको विषयमा तर्क गर्दै अर्थमन्त्री वाग्ले नेपाली जनताले निदाउदा पनि ऋण लिनुपर्ने अवस्थामा रहेको बताएका हुन्।

Watch On

सार्वजनिक ऋणका बिषयमा सांसदहरुले उठाएका प्रश्नमा मन्त्री वाग्लले वर्तमान सरकारले सीमा भन्दा बाहिर गएर दातृ निकायसंग ऋण नलिएको स्पष्ट पारेका हुन्। उत्पादनमुखी क्षेत्रमा आन्तरिक तथा वैदेशिक ऋणको उपयोग गरिएमा सकारात्मक आर्थिक वृद्धि हुने सरकारको विश्वास रहेको उनले बताए।

मुलुकको अर्थतन्त्रलाई गतिशील बनाउन लक्ष्यका साथ आगामी आर्थिक बर्षको बजेट आउने बताएका छन्। सिंहदरबारमा शुक्रबार बसेको राष्ट्रियसभा अन्तर्गतको विकास,आर्थिक मामिला तथा सुशासन समितिको बैठकमा अर्थमन्त्री वाग्लेले अर्थतन्त्रको आकार ठूलो बनाउने सरकारको लक्ष्य भएकाले यसपटकको नीति तथा कार्यक्रम, सिद्धान्त तथा प्राथमिकता र बजेट त्यसतर्फ सोझिएको बताएका हुन्।

उनले आर्थिक सुधारका कामहरुलाई निरन्तरता दिदै मुलुकको अर्थतन्त्रको आकार बढाउनुपर्नेमा जोड दिएका थिए। उनले उद्यममैत्री, निजी क्षेत्रमैत्री र लगानीमैत्री वातावरण निर्माण गरी अर्थतन्त्रलाई सुदृढ बनाउने प्रयासमा सरकार रहेको समेत बताए।

उनले लगानीमैत्री वातावरण बनाएर अर्थतन्त्रको आकार ठूलो बनाउन सके स्रोतको सीमिततामा बस्नुपर्ने असहज अवस्था सहज हुदै जाने उल्लेख गरेका थिए।

मन्त्री वाग्लेले करिव ६० प्रतिशत काम सम्पन्न भइसकेको आयोजनाहरुलाई समयमा नै पुरा गर्न प्रयाप्त बजेट बिनियोजन गरिने जानकारी दिए। बैठकमा समिति सदस्यहरुले अलपत्र आयोजनाहरुलाई पुरा गर्न सक्ने गरि बजेट बिनियोजन गर्नुपर्नेमा जोड दिएका थिए ।