सेनाद्वारा बेनीमा मनसुन विपद् प्रतिकार्य अभ्यास(तस्बिरहरु)

काठमाडौँ । मनसुनको समयमा हुन सक्ने बाढी, पहिरो तथा डुबानजस्ता प्राकृतिक विपद्को जोखिमलाई मध्यनजर गर्दै म्याग्दीको बेनीमा विपद् प्रतिकार्य प्रदर्शन गरिएको छ । बेनीस्थित म्याग्दी नदीमा आयोजित अभ्यासमा नेपाली सेना, नेपाल प्रहरी र सशस्त्र प्रहरी बलको संयुक्त टोलीले विपद्का बेला गरिने उद्दार तथा खोज कार्यको डेमो प्रदर्शन गरेको हो । मनसुन सुरु हुनुअघि सुरक्षा निकायबीच समन्वय, तयारी र प्रतिकार्य क्षमताको परीक्षण गर्ने उद्देश्यले कार्यक्रम आयोजना गरिएको जनाइएको छ । अभ्यासका क्रममा बाढीमा फसेका व्यक्तिलाई डुंगाको सहायताले सुरक्षित स्थानमा ल्याउने, डोरीको प्रयोग गरेर उद्दार गर्ने, घाइतेलाई प्राथमिक उपचारसहित सुरक्षित स्थानसम्म पुर्‍याउने लगायतका अभ्यास गरिएको थियो । त्यसैगरी पहिरो तथा डुबान प्रभावित क्षेत्रमा उद्धार टोली कसरी परिचालन हुन्छ भन्ने विषय पनि प्रदर्शनमार्फत देखाइएको थियो । कार्यक्रममा आधुनिक उद्धार सामग्री तथा उपकरणको प्रयोगसमेत गरिएको थियो । सुरक्षा निकायका अधिकारीहरूले मनसुनको समयमा नदी किनार तथा पहिरो जोखिमयुक्त क्षेत्रमा सतर्कता अपनाउन सर्वसाधारणलाई आग्रह गरेका छन् । उनीहरूले विपद्का बेला अफवाहभन्दा आधिकारिक सूचनामा विश्वास गर्न र आवश्यक परे तत्काल सुरक्षा निकायलाई खबर गर्न अनुरोध गरेका छन् । हरेक वर्ष मनसुनका कारण बाढी, पहिरो र डुबानबाट जनधनको क्षति हुने भएकाले पूर्वतयारीस्वरूप यस्ता अभ्यासलाई प्रभावकारी मानिएको छ । स्थानीयवासी तथा सरोकारवाला निकायको उपस्थितिमा गरिएको उक्त प्रदर्शनले विपद् व्यवस्थापनमा सुरक्षा निकायको तयारी र क्षमता प्रस्तुत गरेको थियो ।
तस्बिरः शिब बोहोरा/नेपाल फोटो लाइब्रेरी

Watch On