रवि लामिछानेको भारत भ्रमणबारे जानकारी दिदै भाजपाको विज्ञप्ती

काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछाने जुन १ तारिख (भोलि)देखि भारत भ्रमणमा जाने भएका छन् । 

भारतको सत्तारुढ दल भारतीय जनता पार्टी (भाजपा) का अध्यक्ष नीतिन नवीनको निमन्त्रणामा सभापति रवि लामिछानेको पहिलो औपचारिक भ्रमण हुन लागेको हो।

Watch On

भाजपाको विदेश मामिला विभागका प्रमुख विजय चाैथाइवालेद्वारा जारी प्रेस विज्ञप्तिअनुसार भ्रमणका क्रममा रास्वपा सभापति लामिछानेले भारतको राजधानी न्यु दिल्लीमा भाजपा अध्यक्ष नीतिन नवीनसहित पार्टीका अन्य वरिष्ठ नेताहरूसँग भेटवार्ता गर्ने कार्यक्रम तय भएको छ।

भ्रमणको मुख्य उद्देश्य रास्वपा र भाजपा बिच पार्टी–स्तरीय सम्बन्ध तथा संवादको सुरुआत गर्नु रहेको विज्ञप्तिमा उल्लेख गरिएको छ। साथै दुवै दलबिच सङ्गठन सञ्चालनका अभ्यास, लोकतान्त्रिक प्रक्रिया तथा जनमुखी राजनीतिक पहुँचका विषयमा अनुभव आदानप्रदान गर्ने अवसरका रूपमा पनि भ्रमणलाई हेरिएको छ।

भाजपाले रास्वपा प्रतिनिधिमण्डललाई स्वागत गर्दै दुई दलबिच रचनात्मक संवाद हुने अपेक्षा व्यक्त गरेको छ।

रास्वपा स्थापना भएयता प्रमुख भारतीय राजनीतिक दलको औपचारिक निमन्त्रणामा पहिला पटक हुन लागेको पार्टी नेतृत्वको भ्रमणलाई नेपाल–भारत राजनीतिक सम्बन्धको सन्दर्भमा अर्थपूर्ण रूपमा हेरिएको छ। 

भ्रमणका क्रममा हुने छलफलले दुवै दलबिचको भावी सहकार्य तथा राजनीतिक सम्बन्धका सम्भावित आयामबारे समेत सङ्केत गर्ने अपेक्षा गरिएको छ।

लामिछाने सहित रास्वपाको भ्रमण टोली भोली दिउँसो १ बजे भारतका लागि प्रस्थान गर्दै छन् । 

भ्रमणटोलीमाा सभापति लामिछाने सहित प्रवास विभाग प्रमुख दिपक बोहरा, सहमहामन्त्री विपिनकुमार आचार्य रहने छन् । 

यस्तै सभापति लामिछानेकी पत्नी निकित पौडेल र स्वकिय सचिव अविनाश आचार्य भ्रमणमा रहने छन् ।