वीरगन्ज । वीरगन्जका मेयर राजेशमान सिंह पक्राउ परेका छन् । जिल्ला अदालत पर्साबाट पक्राउ पुर्जी जारी भएको ८ दिन पछाडि पर्सा प्रहरीले मेयर राजेशमान सिंहलाई पक्राउ गरेको हो । 

पर्साको ठोरीबाट मेयर सिंहलाई पक्राउ गरिएको जिल्ला प्रहरी कार्यालय पर्साका प्रहरी प्रमुख सुदिपराज पाठकले बताए ।

Watch On

पक्राउ पुर्जी जारी भएपछि मेयर सिंह अदालत पुगेर तस्बिर खिचाएर घर फर्किएका थिए । पुर्जी जारी भएका आरोपित अदालतमा पुगेर तस्बिर खिचेर निस्किँदा समेत प्रहरीले उनलाई फरार रहेको भन्दै संरक्षण गरेको थियो । 

यस विषयमा सिधाकुरामा समाचार प्रकाशन भएपछि प्रहरीले उनलाई खोजी गरिरहेको दाबी गरे पनि सुरक्षा निकायसँगको सम्पर्कमै रहेका मेयर सिंह जिल्ला बाहिर पुगेका थिए । 

अदालतमा मुद्दा छ, वीरगंजका मेयर कहाँ छन् ?

मङ्गलवार भने सुरक्षा निकायसँगको समन्वयमा नै उनलाई अदालत उपस्थित गराउन प्रहरीले नियन्त्रणमा लिएको थियो । आज भने उनलाई थुनछेकका लागि अदालत पेश गरिएको प्रहरीले जनाएको छ । 

जिल्ला प्रहरी कार्यालयका अनुसार सिंहलाई जिल्ला अदालत पर्सामा उपस्थित गराइएको छ । 

गएको १२ गते जिल्ला अदालत पर्साले लिखत सम्बन्धी कसुरमा पक्राउ गर्न मेयर सिंहविरूद्ध पक्राउ पुर्जी जारी गरेको थियो । 

स्थानीय लियाकत अलीको जाहेरी बमोजिम जिल्ला अदालत पर्साले मेयर सिंहसहित तीनजना विरुद्ध पक्राउ पुर्जी जारी गरेको छ । 

वीरगन्जका मेयर राजेशमानले कागजात किर्ते गरेर नागरिकता दिएको विषय सिधाकुराले खुलासा गरेको थियो । मेयरको नागरिकता कीर्तेबारे सबै समाचार पढ्नुहोस् ।