प्रधानमन्त्रीको भनाइमा सरकारका प्रवक्ताको स्पष्टीकरणः ‘मिचेको भन्नु भएको होइन, अचम्म लागेको बताउनु भएको हो’

काठमाडौँ । सरकारका प्रवक्ता एवं शिक्षा तथा खेलकुद मन्त्री सस्मित पोखरेलले ‘प्रधानमन्त्रीले नेपालले भारतको सीमा मिचेको नभई भारतीय पक्षबाट त्यस्तो कुरा आउँदा आफूलाई अचम्म लागेको सदनलाई जानकारी गराउनु भएको’ स्पष्टीकरण दिएका छन् ।

आज मन्त्रिपरिषदको बैठकपछि सञ्चारकर्मीहरुसँग कुरा गर्दै मन्त्री पोखरेलले भने– ‘तपाईँहरुले फेरि पनि सुन्न सक्नु हुने छ, प्रधानमन्त्रीले अचम्म मान्नु भएको हो, त्यसैगरी नै भन्नु भएको हो ।’

Watch On

मन्त्री पोखरेलले सीमा समाधान सम्बन्धी सरकारी संयन्त्र रहेको र सो संयन्त्रमा ‘भारतले उपभोग गरिरहेको जग्गा नेपालमा पर्न सक्ने र नेपालले उपभोग गरिरहेको जग्गा पनि भारतमा पर्न सक्ने’ भनेर आएका कुरालाई प्रधानमन्त्रीले भन्नु भएको स्पष्ट पारे ।

‘प्रधानमन्त्रीले नेपालले भारतको सीमा मिचेको छ भनेर भन्नु भएको होइन, यस्ता पनि कुरा आएका छन्, ती सबै विवाद कूटनीतिक संवादबाटै समाधान गर्नुपर्छ भनेर भन्नु भएको हो’ मन्त्री पोखरेलले भने ।

मन्त्री पोखरेलले प्रधानमन्त्री सदनप्रति उत्तरदायी रहेको बताए । ‘अस्ति सदनमा गएर जवाफ दिनु भयो, आवश्यक पर्दा फेरि पनि जवाफ दिनु हुन्छ’ उनले भने ।

सोही क्रममा मन्त्री पोखरेलले राष्ट्रिय मानवअधिकार आयोगको प्रतिवेदन सरकारलाई औपचारिक रुपमा प्राप्त नभएको बताए । ‘नेपाल सरकारलाई औपचारिक रुपमा आइसकेपछि सरकार अगाडि बढ्छ’ उनले भने ।