रास्वपाको प्रतिनिधित्व नभएको राष्ट्रियसभाले फेल गरिदियो सरकारको विधेयक, अप्ठेरो पार्ने पुराना दलको रणनीति

काठमाडौँ । सत्तारूढ राष्ट्रिय स्वतन्त्र पार्टी(रास्वपा)को सहभागिता नभएको माथिल्लो सदन राष्ट्रियसभाले सरकारले ल्याएको विधेयक फेल गरिदिएको छ । 

अर्थमन्त्री डा.स्वर्णिम वाग्लेले राष्ट्रिय सभामा छलफल अगाडि बढाउन तयार गरेको वैकल्पिक वित्त विकास परिचालन विधेयक फेल भएको हो । 

Watch On

प्रतिनिधिसभाबाट अर्थ विधेयकको रूपमा अगाडि बढेको वैकल्पिक वित्त विधेयक ७ जेठमा पारित भएर राष्ट्रिय सभा पुगेको थियो । 

प्रतिनिधिसभाले पारित गरेर पठाएको १५ दिनभित्र अर्थसम्बन्धी विधेयक राष्ट्रियसभाले पारित गरिसक्नुपर्छ । यसअनुसार २२ जेठभित्र पारित भई सक्नुपर्नेमा विपक्षी दलहरूको अवरोधले २६ गतेसम्म बैठक स्थगित हुँदा राष्ट्रियसभाबाट विधेयक फेल हुने अवस्था बनेको हो । 

आजको बैठकमा अर्थमन्त्री वाग्लेले वैकल्पिक वित्त विकास परिचालन विधेयकमाथि विचार गरियोस् भन्ने प्रस्ताव पेस गर्ने कार्यसूची थियो । प्रधानमन्त्रीको सिमासम्बन्धी अभिव्यक्तिलाई लिएर राष्ट्रिय सभाका सबै दलले अवरोध गरेपछि २६ गतेसम्मका लागि स्थगित भएको छ । 

राष्ट्रिय सभा अध्यक्ष नारायण दाहालले प्रधानमन्त्रीको अभिव्यक्ति प्रतिनिधिसभाको विषय भएकाले कम्तीमा यो विधेयक पास गर्न सहयोग गर्न अनुरोध गरेका थिए । तर, दलहरू नमानेपछि इतिहासमै राष्ट्रिय सभाबाट पहिलो पटक विधेयक फेल भएको हो । 

विधेयक फेल भए पनि प्रतिनिधि सभाले अब सोझै राष्ट्रपतिकहाँ प्रमाणीकरणका लागि पठाउन मिल्नेछ । 

तर रास्वपाको प्रतिनिधित्व नभएको तर पुराना दलको वर्चस्व रहेको राष्ट्रिय सभाले नयाँ सरकारलाई अप्ठेरो पार्ने नीति लिएको देखिएको जानकारहरू बताउँछन् ।