रविले मोदीलाई दिए शालिग्रामदेखि पशुपतिनाथको चन्दनसम्म उपहार, मिथिलाको दोसल्ला ओढाइदिँदा प्रफुल्लित

सिधाकुरा

बिहीबार, जेठ २१, २०८३

रविले मोदीलाई दिए शालिग्रामदेखि पशुपतिनाथको चन्दनसम्म उपहार, मिथिलाको दोसल्ला ओढाइदिँदा प्रफुल्लित

नरेन्द्र मोदीलाई कालीगण्डकीको शालिग्राम, पशुपतिनाथको चन्दन, जनै उपहार दिदै रवि लामिछाने र उनकी धर्मपत्नी निकिता पौडेल लामिछाने।

काठमाडौँ । भारतको पहिलो औपचारिक भ्रमणमा रहेका राष्ट्रिय स्वतन्त्र पार्टी (रास्वपा) सभापति रवि लामिछानेले भारतीय प्रधानमन्त्री नरेन्द्र मोदीलाई विशेष उपहार दिएका छन् ।

Watch On

प्रधानमन्त्री कार्यालय हैदरावाद हाउसमा बुधबार भएको एक घण्टा लामो वार्तापछि सभापति लामिछानेले नेपालको तर्फबाट विशेष उपहार प्रदान गरेका हुन् ।

भगवान शिवको ठूलो भक्त रहेका मोदीलाई सभापति लामिछाने र उनकी धर्मपत्नी निकिता पौडेल लामिछानेले कालीगण्डकीको शालिग्राम, पशुपतिनाथको चन्दन, जनै प्रदान गरेका थिए ।

त्यसैगरी जानकी मन्दिरको फ्रेम दिँदै मिथिला सभ्यता झल्किने विशेष सल (दोसल्ला) ओढाइदिएका थिए । यसैगरी पशुपति नाथ मन्दिरको रिप्लिका (आकृति) पनि प्रदान गरिएको थियो ।

नेपाली प्रतिनिधिमण्डलले आफ्नो आस्था जोडिनेगरी उपहार दिँदा मोदी अत्यन्त हर्षित भएको सभापति लामिछानेको सचिवालयले जनाएको छ ।

यसक्रममा मोदीले नेपाल आउँदा आफू पशुपतिनाथ, मुक्तिनाथ, जानकी मन्दिरको दर्शन गर्ने मौका पाएको स्मरण गरेका थिए । फेरि पनि पशुपतिनाथ बाबाको दर्शन गर्न समय मिलाएर आउने इच्छा व्यक्त गरेका थिए ।