इपीजी प्रतिवेदन रहेको दराजको साँचो  परराष्ट्र मन्त्रालयलाई बुझाइयो

काठमाडौँ । नेपाल–भारत प्रबुद्ध व्यक्ति समूह (ईपीजी) को प्रतिवेदन औपचारिक रूपमा पेस नभएको र त्यो केवल परराष्ट्र मन्त्रालयको दराजमै  सीमित रहेको छ । ईपीजीका नेपाल संयोजक डा. भेषबहादुर थापाले मन्त्रालयलाई प्रतिवेदन नभई प्रतिवेदन राखिएको दराजको साँचो मात्र हस्तान्तरण गरेका छन्। 

उमेरले वृद्ध थापाले आफ्नो स्वास्थ्यका कारण कालान्तरमा सरकारकै सम्पत्तिकारुपमा रहने भएकाले पनि साँचो हस्तान्तरण गरेको बताएका छन् । 

Watch On

नेपाल र भारतबीच १९५० को मैत्री सन्धि लगायतका पुराना सम्झौता पुनरावलोकन गरी सुझाव दिन दुवै देशका प्रधानमन्त्रीको पहलमा सन् २०१६ मा ईपीजी गठन गरिएको थियो । सन् २०१८ मै प्रतिवेदन तयार भए पनि दुवै देशका प्रधानमन्त्रीले बुझ्न समय नदिएका कारण प्रतिवेदन हालसम्म अलपत्र अवस्थामा छ ।

ईपीजी दुवै देशका प्रधानमन्त्रीहरूको विशेष म्यान्डेटमा बनेकाले प्रतिवेदन खोल्ने र यसको अन्तिम निर्णय गर्ने अधिकार पनि उनीहरूमै छ ।

लामो समयदेखि दुई देशबीचको कूटनीतिक गतिरोधका रूपमा रहेको ईपीजी प्रतिवेदनलाई लिएर नेपालमा सरकारले आफैँले ग्रहण गर्नुपर्ने वा सार्वजनिक गर्नुपर्ने दबाब बढिरहेको छ । 

कुटनीतिक क्षेत्रका जानकारका अनुसार ईपीजी प्रतिवेदन नेपालकै हितमा समेत छैन । भारतका लागि नेपालका पूर्वराजदुत   शंकर शर्माले ईपीजी प्रतिवेदनका कतिपय बुँदा नेपालका हितमा समेत नरहेको उल्लेख गरेका छन् । यद्यपि प्रतिवेदन दुबै देशका परराष्ट्र मन्त्रालयका दराजमा थन्किएका छन् ।