अन्तर–व्यवस्थापिका सम्मेलन भोलिदेखि टीकापुरमा

काठमाडौँ । संघीय संसदका दुवै सदन र सातवटै प्रदेश सभाबीच समन्वय, सहकार्य तथा संसदीय अनुभव आदानप्रदानलाई थप प्रभावकारी बनाउने उद्देश्यले आयोजित उच्चस्तरीय अन्तर–व्यवस्थापिका सम्मेलन सुदूरपश्चिम प्रदेशको टीकापुरमा शनिबार सुरु हुँदैछ।

जेठ २३ र २४ गते सञ्चालन हुने सम्मेलनमा सहभागी हुन प्रतिनिधि सभाका  सभामुख डोलप्रसाद (डीपी) अर्याल, राष्ट्रिय सभाका अध्यक्ष नारायणप्रसाद दाहाल, प्रतिनिधि सभाका उपसभामुख रूवी कुमारी, राष्ट्रिय सभाका उपाध्यक्ष लीलाकुमारी भण्डारी लगायत संघीय संसद् तथा प्रदेश सभाका पदाधिकारीहरू आज धनगढी पुगेका छन् ।

Watch On

शनिबार बिहान ८ः३० बजे सम्मेलनको उद्घाटन हुनेछ। सुदूरपश्चिम प्रदेश सभाका सभामुख भीमबहादुर भण्डारीको अध्यक्षतामा हुने उद्घाटन सत्रमा प्रतिनिधि सभाका सभामुख र राष्ट्रिय सभाका अध्यक्षले संयुक्त रूपमा सम्मेलनको उद्घाटन गर्नेछन् ।

शनिबार दिउँसो १२ः३० बजेदेखि हुने बन्द सत्रमा संसदीय प्रणाली र कानुन निर्माणसँग सम्बन्धित विभिन्न विषयमा कार्यपत्र प्रस्तुत गरिनेछ। कार्यपत्र प्रस्तुतिपछि संघीयता कार्यान्वयनको अवस्था, सभा सञ्चालनका असल अभ्यास, अन्तर–व्यवस्थापिका समन्वय तथा आगामी कार्यदिशाका विषयमा सहभागीहरूबीच बृहत् छलफल हुने जनाइएको छ ।

आइतबार टीकापुर घोषणापत्र जारी गर्दै सम्मेलन समापन हुने संसद् सचिवालयले जनाएको छ ।