सरुवा बढुवाका लागि भनसुन नगर्न कर्मचारीहरुलाई कानुनमन्त्री गौतमको आग्रह

काठमाडौँ । कानुन न्याय तथा संसदीय मामिला मन्त्री सोबिता गौतमले कर्मचारीहरुलाई भनसुन नगर्न आग्रह गरेकी छन् । 

कानुन अधिकृतहरुको दोस्रो सम्मेलनलाई शनिबार समापन गर्दै मन्त्री गौतमले सोर्सफोर्स लगाउने कुराबाट टाढै रहन सचेत गराएकी हुन् । अहिले प्रधानमन्त्री कार्यालयले भनसुन गर्नेलाई कारबाही गरिरहेको उल्लेख गर्दै यसबाट जोगिन न्याय सेवाका कर्मचारीलाई अनुरोध गरेकी हुन् । 

Watch On

‘यो सोर्सफोर्स गर्ने जुन चलन छ, त्यसबाट सबैजना टाढा हुन मेरो आग्रह छ । खुसुक्क आएर एक जनाले सोर्सफोर्स लगाइहाल्नु भयो भने एक जनालाई न्याय होला, अरुलाई त अन्याय हुन्छ नि । त्यो अन्याय गर्ने पात्र मन्त्रालय होइन तपाइहरुकै साथी हो । त्यसकारण साथीले साथीलाई धोका दिने काम बन्द गर्नुस् । कसैले पनि कसैलाई सोर्सफोर्स नलाउने भने सबैको कार्यसम्पादनको मूल्यांकन हुन्छ । कुनै पनि तरिकाले हुन्छ नि । तीनै कुरालाई आधार मानेर भोलिका दिनमा काम गर्न सहज हुन्छ’, उनले भनिन् ।  

मन्त्री गौतमले भनसुन गर्दा उल्टै कारबाही परिने पनि बताइन् । ‘अहिले प्रधानमन्त्रीको निर्देशनमा प्रधानमन्त्री कार्यालयले सक्रिय रुपमा भनसुन कसले गर्छ, त्यो भनसुन गर्ने मान्छेलाई भनसुन गरेको ठाउँभन्दा झन् पर पुर्याउने एउटा नीतिमा काम गरिराखेको छ । त्यसैले कहिले कहिले हुन्छ भनेर आउनुहुन्छ, हुने भन्दा झन विग्रेर जाने भयो भने त्यसको घाटा तपाइलाई नै हुन्छ’, उनले भनिन् । 

मन्त्री गौतमले मन्त्रालयमा काम गर्न पाइयोस् भन्ने चाहनालाई सम्बोधन गर्न स्वचालित अनुमानयोग्य र व्यवहारिक कसरी बनाउन सकिन्छ भन्ने कुरामा आगामी दिनमा ध्यान दिइने बताइन् । ‘स्वचालित, अनुमानयोग्य भयो भने देश त हाम्रै हो, पूर्व पश्चिम, पहाड तराई वा कोर काठमाडौंमा काम गर्नुपरे पनि आखिर देश त हाम्रै हो नि । के मात्रै हो भने स्वचालित, अनुमानयोग्य होस् । थितिमा होस् । त्यति न हो । होइन भने काम गर्न हिच्किचाउनु त्यति उचित हुँदैन’, उनले भनिन् । 

मन्त्री गौतमले राज्य सञ्चालनमा जति जिम्मेवारी राजनीतिक नेतृत्वको हुन्छ, त्यति नै कर्मचारी संयन्त्रको पनि हुने भन्दै अनुशासित, लगनशील र देशप्रति समर्पित भएर मिलेर काम गर्न अपिल समेत गरिन् ।