सरकारद्वारा ६२ जिल्लामा ‘सरकारी कुरियर’ सेवा विस्तार, सिमकार्डदेखि स्वास्थ्य सामग्री घर आगनमै पुर्‍याइने

काठमाडौं । सरकारले आम नागरिकलाई झन्झटिलो सरकारी प्रक्रियाबाट मुक्ति दिँदै अत्यावश्यक सेवाहरू सिधै घरदैलोमा पुर्‍याउने काम सुरु गरेको छ ।

हुलाक सेवा विभागले सार्वजनिक गरेको पछिल्लो तथ्याङक अनुसार देशका ६२ जिल्लामा सरकारी कुरियर मार्फत सेवा विस्तार भइसकेको छ । सरकारी कुरियर मार्फत सेवा विस्तार भएका ६२ जिल्लाका नागरिकले नेपाल टेलिकमको सिम कार्डदेखि लिएर औषधी तथा स्वास्थ्य सामग्रीहरू समेत आफ्नै घर आँगनमा प्राप्त गर्ने भएका छन् ।

Watch On

स्वास्थ्य बिमा बोर्ड र हुलाक सेवा विभागबीच भएको सम्झौता बमोजिम जेठ १९ गतेदेखि नै देशका ६२ जिल्लामा स्वास्थ्य सामग्री ढुवानीको काम सुरु भइरहेको छ ।

यसका साथै नागरिकलाई घरमै बसेर प्रविधि र सञ्चारको पहुँच पुर्‍याउन नेपाल टेलिकमको सिम कार्ड समेत घरदैलोमै वितरण गर्ने योजना सहित हुलाक र टेलिकमका उच्च अधिकारीबीच चौथो चरणको निर्णायक छलफल समेत सम्पन्न भइसकेको छ ।

६२ जिल्लाका नागरिकलाई छिटो र छरितो रूपमा राहदानी (पासपोर्ट) उपलब्ध गराउन विभागले राहदानी विभागलाई पूरक सम्झौताको मस्यौदा समेत पठाइसकेको छ ।

प्रधानमन्त्री तथा मन्त्रिपरिषद्को कार्यालयसँगको समन्वयमा हुलाकको आधुनिकीकरण गर्ने र विश्व हुलाक संघको निर्देशिका अनुसार अन्तर्राष्ट्रिय स्तरको पार्सल सेवालाई अद्यावधिक गर्ने काम समेत दोस्रो चरणमा पुगेको छ ।

सरकारले हुलाक सेवालाई घरेलु र अन्तर्राष्ट्रिय स्तरमा पूर्ण रूपमा डिजिटल र अन–डिमान्ड डेलिभरी मोडलमा ढालेपछि अब ६२ जिल्लाका सर्वसाधारणले सरकारी सेवा लिन धाउनुपर्ने बाध्यता हट्दै गएको छ ।

हुलाक सेवालाई थप वैज्ञानिक बनाउन डाँक रेखा पुनरावलोकन सम्बन्धी महानिर्देशकको अध्यक्षतामा गठित समितिले गृह, संघीय मामिला, सञ्चार मन्त्रालय, नापी विभाग र हुलाकका प्रतिनिधिहरूको उपस्थितिमा नयाँ डाँक रेखा समेत स्वीकृत गरेको छ ।

राष्ट्रिय स्वास्थ्य, शिक्षा, सूचना तथा सञ्चार केन्द्र र हुलाक सेवा विभाग बीच गत जेठ १ गते भएको सम्झौता बमोजिम डाँक डेलिभरीलाई तीव्रता दिइएको हो ।