१३८ किलो सुन तस्करी प्रकरण : ८ जनालाई पुर्पक्षका लागि थुनामा राख्न आदेश

काठमाडाैँ : अदालतले १३८ किलो सुन तस्करी प्रकरणमा पक्राउ परेका ८ जनालाई पुर्पक्षका लागि थुनामा राख्न आदेश दिएको छ ।

Watch On

जिल्ला अदालत काठमाडौँका न्यायाधीश शंकर बहादुर राईको आइतबार बसेको इजलासले सबै प्रतिवादीलाई पुर्पक्षका लागि थुनामा पठाउन आदेश दिएको जिल्ला अदालत काठमाडौँका सूचना अधिकारी चन्द्रप्रसाद पन्थीले जानकारी दिए ।

विमानस्थल भन्सार कार्यालयले २२ मंसिरमा दुबईबाट १४ किलो सुन लिएर आउँदै गरेका गोरखाका चन्द्र घलेलाई विमानस्थलबाटै पक्राउ गरेर अनुसन्धान गरेको थियो । 

भन्सारले अनुसन्धानका क्रममा चन्द्र घले र उनको समूहले विमानस्थलबाट सेटिङ मिलाएर १३८ किलो सुन तस्करी गरेको भन्दै सोही बराबर बिगो र जरिवाना दाबी गरेको थियो ।

त्यस्तै अनुसन्धानका क्रममा घलेको समूले विमानस्थलका कर्मचारीसँग साँठगाँठ मिलाएर तस्करी गर्ने गरेको खुलासा भएका थियो । उक्त समूहले नागरिक उड्डयन कार्यालयका एसी मेकानिक राधाकृष्ण श्रेष्ठ, कार्यालय सहयोगी लेकबहादुर तामाङ, सेवा निवृत्त भएर करारमा कार्यरत कर्मचारी रमेश देउला, एसी शाखामा काम गर्ने सहयोगी अनिल श्रेष्ठ र प्लम्बर शेरबहादुर बस्नेतको संलग्नता रहेको देखाएको थियो । 

त्यस्तै सुन लिएर नेपाल आएका चन्द्र घलेको बयानका आधारमा गोरखाका मीनबहादुर घले पक्राउ परेका थिए । उनीहरु सबैलाई पुर्पक्षलाई लागि थुनामा पठाउन अदालतले आदेश दिएको हो । त्यस्तै यसअघि सुन तस्करी गर्ने स्याङ्जाका कृष्णकुमार श्रेष्ठपनि पुर्पक्षका लागि कारागार चलान भएका छन्।

यही मुद्दामा प्रतिवादी बनाइएका डीबी भन्ने दनबहादुर गुरुङ र उनकी पत्नी बिना गुरुङ भने फरार छन्।

उनीहरु सबैलाई सुन तस्करीको मुद्दामा थुनामा पठाउने आदेश भएको भन्सारले जनाएको छ ।