सदनको गतिरोध हटाउन रवि लामिछानेले बोलाएको बैठकमा पुगे श्रम संस्कृतिका आरेन राई

काठमाडौँ । सदनमा जारी गतिरोध हटाउन सत्तारुढ रास्वपाका सभापति रवि लामिछानेले प्रतिपक्षी दलहरुसँग सम्वाद गरिरहेका छन् । 

सहमति खोज्न सत्ता र प्रतिपक्षी सम्वादमा जुट्दा ११ बजे बोलाइएको प्रतिनिधि सभा बैठक अझै सुरु हुन सकेको छैन । 

Watch On

सिंहदरबारस्थित संसद भवनभित्र जारी बैठकमा रास्वपा सभापति लामिछानेसहित मुख्य सचेतक कबिन्द्र बुर्लाकोटी, सचेतक क्रान्तिशिखा धिताल, कांग्रेस संसदीय दलका नेता भीष्मराज आङदेम्बे, प्रमुख सचेतक बासना थापा, सचेतक निश्कल राई, एमाले दलका नेता रामबहादुर थापा, प्रमुख सचेतक ऐन महर, नेकपाका प्रमेश हमाल, वर्षमान पुन, युवराज दुलाल, राप्रपा प्रमुख सचेतक खुश्बु ओली र कानुनमन्त्री सोविता गौतम सहभागी छन् । बैठकमा सुरुवमा सहभागी नभएका हर्क साम्पाङको दल श्रम संस्कृति बाट अहिले आरेन राई उपस्थिति भएका छन् । 
छलफल जारी छ । 

प्रधानमन्त्री शाहले जेठ १७ गते संसदमा प्रश्नोत्तरका क्रममा नेपालले पनि भारतको जमिन मिचेको रहेछ भनेर अभिव्यक्ति दिएपछि त्यसयता विपक्षी दलहरुले प्रधानमन्त्रीले सदनमा आएर माफी माग्दै अभिव्यक्ति सच्याउनुपर्ने माग गरेर सदन अवरुद्ध गर्दै आएका छन् । अवरोधका कारण १८, १९, २५, २६ गतेको बैठक कार्यसूचीमा प्रवेश नगरी स्थगित भएको छ । बजेटको छलफल प्रभावित भएको छ । 

रास्वपा सभापति रबि लामिछानेले जेठ २५ गते सर्वदलीय बैठक राखेर प्रधानमन्त्रीको अभिव्यक्तिको सम्बन्धमा परराष्ट्रमन्त्री जवाफ दिने र त्यतिले नपुगे आफूले जवाफ दिने विकल्प अघि सारेका थिए । तर, विपक्षीले प्रधानमन्त्री नै आउनुपर्ने अडान राखेर अवरोध गरिरहेका छन् । 

आज पनि सहमति नजुटे बजेटको छलफललाई अगाडि बढाउनुपर्ने चापका कारण अवरोधकै बीच बैठक चलाउने तयारी सत्ता पक्षको छ । 

२६ गतेको बैठकमा परराष्ट्र मन्त्री शिशिर खनाल प्रधानमन्त्रीको अभिव्यक्तिको सन्दर्भमा जवाफ दिन आएका थिए । तर, विपक्षीले प्रधानमन्त्रीले बोलेको कुरामा प्रधानमन्त्रीकै प्रष्टीकरण चाहिने भन्दै बैठक चल्न दिएका थिएनन् ।