पाँच पटकको च्याम्पियन ब्राजिलसँग मोरक्कोको बराबरी

काठमाडौँ। पाँच पटकको च्याम्पियन ब्राजिलले फिफा विश्वकप २०२६ को आफ्नो पहिलो खेलमा मोरक्कोसँग १–१ को बराबरी खेलेको छ ।

आइतबार बिहान न्यु जर्सीको मेटलाइफ मैदानमा अग्रता भने मोरक्कोले बनायो । ब्राजिल अंक जोगाउन सफल भएको हो । 

Watch On

ब्राजिल सन् १९३४ देखि लगातार आफ्नो पहिलो खेलमा पराजित भएको छैन । यसपटक समेत ब्राजिलले यो कीर्तिमानलाई निरन्तरता दियो । 

समूह ‘सी’ को पहिलो खेलको पहिलो हाफमै दुई गोल भएका थिए । सन् २०२२ मा सेमिफाइनल खेलेको मोरक्कोले अग्रता बनायो ।

इस्माइल साइबारीले खेलको २१औं मिनेटमा गोल गरे । उनलाई ब्राहिम डिआजले पास मिलाएका थिए । 

तर, यो अग्रता धेरै बेर टिकेन । रियाल मड्रिडका स्टार भिनिसियस जुनियरले ३२औं मिनेटमा बराबरी गोल गरे । ब्रुनो गुइमारेजले मिलाएको पासमा उनले सानदार फिनिसिङ गरेका थिए । 

यो खेलमा प्रशिक्षक कार्लाे एन्सोलोटीले चर्चित स्ट्राइकर नेयमारलाई विश्राम दिएका थिए । नेयमार रिकवरी हुने अवस्थामा छन् । उनी दोस्रो खेलमा उपलब्ध हुने विश्वास गरिएको छ । 

अब, ब्राजिल आफ्नो दोस्रो खेल शुक्रबार हाइटीसँग खेल्दा मोरक्को सोही दिन स्कटल्यान्डसँग खेल्नेछ । 

समूह ‘सी’ कै अर्काे खेलमा स्कटल्यान्डले हाइटीलाई १–० ले हराउँदै शीर्ष स्थानमा उक्लिएको छ । स्कटल्यान्डको जितमा निर्णायक गोल जोन म्याकगिनले गरेका थिए । 

यो खेलपछि स्कटल्यान्डसँग तीन अंक रहँदा मोरक्को र ब्राजिलले समान एक अंक जोडेका छन् । हाइटी भने अंकविहिन छ ।