फ्रान्सको जितमा एम्बाप्पेको तीन कीर्तिमान, उछिने मेसीलाई

काठमाडौँ । फ्रान्सले फिफा विश्वकप २०२६ मा सानदार सुरुवात गर्दा कप्तान तथा स्ट्राइकर केलियन एमबाप्पेले तीन वटा कीर्तिमान भंग गरेका छन् । खेलमा फ्रान्सले सेनेगललाई ३–१ ले हरायो । 

सन् २०१८ को च्याम्पियन तथा सन् २०२२ को उपविजेता फ्रान्सको जितमा एम्बाप्पेले दुई गोल गरे । ब्राड्ली बार्काेलाले एक गोल थपे । सेनेगलको लागि इब्राहिम एमबायेले एक गोल फर्काएका हुन् । 

Watch On

दुई गोलसँगै एमबाप्पे फ्रान्सका लागि अन्तर्राष्ट्रिय फुटबलमा सबैभन्दा धेरै गोल गर्ने खेलाडी बनेका छन् । उनले ओलिभियर  जिरुडकोे ५७ गोलको कीर्तिमानलाई पछि पारे । 

त्यस्तै, विश्वकपमा पनि फ्रान्सका लागि सर्वाधिक गोलकर्ता बने । यस्तै, उनले विश्वकपको लागि १४ गोल गरेका छन् । वेष्ट जर्मनीका गर्ड मुलरले पनि समान १४ गोल गरेका हुन् । यो गोलसँगै एम्बाप्पेले एकै पटक अर्जेन्टिनाका कप्तान लियोनल मेसी र फ्रान्सकै जष्ट फोन्टेनलाई पछि पारेका छन् । मेसी र फोन्टेनको नाममा १३ गोलको रहेको छ । 

अब, १४ गोल गरेका एम्बाप्पे ब्राजिलका रोनाल्डो (१४) र जर्मनीका मिलोस्लाभ क्लोज (१६) भन्दा दुई गोलले मात्रै पछि छन् । विश्वकपका बाँकी खेलमा तीन गोल गरे एम्बाप्पे सर्वाधिक गोलकर्ता चुनिनेछन् । 

मेट लाइफ मैदानमा खेलको पहिलो पहिलो हाफ गोलरहित बराबरीमा सकिएको थियो । ६६औं मिनेटमा एमबाप्पेले अग्रता दिलाए । माइकल ओलिसले थ्रु पास निकालेपछि एम्बाप्पेले बक्स भित्रबाट सहज गोल गरेका थिए । 

८२औं मिनेटमा बार्काेलाले अग्रता २–० को बनाए । उनलाई एड्रिएन राविओटले पास मिलाइदिएका थिए । इन्जुरी समयको पाँचौं मिनेटमा इब्राहिमले गोल गर्दै सेनेगललाई २–१ को अवस्थामा पुर्याएका हुन् । तर, एम्बाप्पेले एक मिनेटपछि अर्काे गोल थप्दै ३–१ को जित सुश्चित गरेका थिए । 

अब, फ्रान्सले समूह ‘आई’को अर्काे खेलमा इराकसँग खेल्नेछ । त्यसपछि नर्वेसँग खेल्ने तालिका छ ।