'मन्त्रालय बन्यो, बजेट पनि आयो' अब खर्च गर्न कानुन बनाइदिनुस्ः मन्त्री पुन

काठमाडौँ । विज्ञान, प्रविधि तथा नवप्रवर्तनमन्त्री महावीर पुनले विज्ञान तथा नवप्रवर्तन क्षेत्रलाई अघि बढाउन आवश्यक कानुन, ऐन तथा नीति चाँडो बनाएर सहयोग गरिदिन आग्रह गरेका छन्।

बिहीबार प्रतिनिधिसभा बैठकमा बिनियोजन विधेयकमाथिको छलफलमा उठेका प्रश्नको जवाफ दिने क्रममा मन्त्री पुनले आणविक ऊर्जा ऐन, जैविक सुरक्षा तथा जैविक प्रविधि, विज्ञान प्रविधि तथा नवप्रवर्तन लगाएतका ऐन बनाउने कार्यमा सहयोग गर्न आग्रह गरेका हुन्।

Watch On

उनले मन्त्रालयको कार्य प्रभावकारी बनाउन कानुन अपरिहार्य रहेकाले पनि यस तर्फ ध्यानाकर्षण गराएका थिए। कानुन बन्न ढिलाई भएमा मन्त्रालयका निम्ति छुट्याइएको यस वर्षको बजेट कार्यान्वयनमा जान समेत ढिलो हुने जसले गर्दा मन्त्रालयको कार्यसम्पादन राम्रो नहुने हुँदा आवश्यक कानुन अपरिहार्य रहेका बताए।

उनले भने, ‘बजेट खर्चका विषयमा एक जना सचिव ज्यूलाई सोधेको थिए। उहाँले कानुन बिना खर्च गर्न सकिदैन भन्नु भयो। मैले कानुन बन्न लाग्ने समय सोधे एउटा कानुन बन्न ६ महिना जति लाग्ने भनेर सुनाउनु भयो । त्यसैले आवश्यक कानुनलाई चाँडो बनाएर सहयोग गरिदिन अनुरोध गर्दछु।’

त्यस्तै मन्त्री पुनले विज्ञान, प्रविधि तथा नवप्रवर्तनमार्फत मुलुकको अर्थतन्त्रमा महत्वपूर्ण योगदान गर्न स्थानीय र प्रदेश सरकारलाई समेत आवश्यक बजेट छुट्टाउन सुझाव दिएका छन्।

मन्त्रालयलाई छुट्टाइएको ४ अर्व मध्ये योजना र कार्यक्रम नभएकाले साढे ३ करोड भने अवण्डामा रहेको उनले जानकारी दिए। मन्त्री पुनले विगतमा अनुसन्धान गर्ने अनि कागजमा थन्क्याउने मात्रै काम भइरहेकाले अव अनुसन्धान गर्ने निकायलाई प्राथमिकतामा राखिने उल्लेख गरेका थिए।