१२ वर्षपछि जर्मनी नकआउट चरणमा , नायक बने डेनिज

काठमाडौं । चार पटकको च्याम्पियन जर्मनी फिफा विश्वकप २०२६ को नकआउट चरणमा प्रवेश गरेको छ । शनिबार राति टोरन्टो रंगशालामा वैकल्पिक खेलाडी डेनिज उन्डभले दुई गोल गरेपछि जर्मनीले अफ्रिकन टोली आइभरी कोष्टलाई २–१ ले हरायो ।

पहिलो खेलमा जर्मनीले कुराकाओलाई ७–१ ले हराएको थियो । समूह ‘ई’ मा लगातार जित निकाल्न सफल भएको जर्मनीसँग ६ अंक रहेको छ । पराजित आइभरी कोष्टको तीन अंकमात्रै रह्यो ।

Watch On

सन् २०१४ को च्याम्पियन जर्मनी पछिल्ला दुई संस्करण समूह चरणबाटै बाहिरिएको थियो । यसपटक भने टिमले अन्तिम खेलअघि नै नकआउट चरण पक्का गर्‍यो । अब, जर्मनीले अन्तिम खेलमा इक्वेडरसँग जुन २६ मा खेल्ने तालिका छ ।

खेलमा अग्रता भने पहिलो हाफमा आइभरी कोस्टले नै बनायो । कप्तान फ्रान्क केसीको ३०औं मिनेटमा अग्रता दिलाएका हुन् । खेलमा नायक बनेका डेनिज ६०औं मिनेटमा अट्याकिङ मिडफिल्डर यमाल मुसियालाको स्थानमा मैदान प्रवेश गरेका थिउ ।

आठ मिनेटमै उनले टिमलाई बराबरीमा ल्याएका हुन् । नादिम अमिरीको सुन्दर क्रसलाई डेनिजले सदुपयोग गरेका थिए ।  २९ वर्षीय स्टुटगार्डका स्ट्राइकरले खेलको इन्जुरी समयमा जर्मनीको लागि विजयी गोल गरेका थिए । यसपटक डिफेन्सिभ मिडफिल्डर फेलिक्स एनमेकाले उनलाई बल उपलब्ध गराएका थिए । 

जर्मनीले पहिलो पटक १९५४ मा विश्वकप जितेको थियो । दोस्रो पटक १९७४ तथा तेस्रो पटक सन् १९९० मा जितेको हो । पछिल्लो पटक भने टिमले ब्राजिलमा भएको सन् २०१४ को विश्वकप जितेको हो । त्यसपछि भने टिम समूह चरण  पार गर्न सकेको थिएन ।