रास्वपा केन्द्रीय सदस्यमा दीपक बोहराको उम्मेदवारी घोषणा

काठमाडौँ । राष्ट्रिय स्वतन्त्र पार्टीका नेता एवम् सांसद दीपक बोहराले केन्द्रीय सदस्य पदमा उम्मेदवारी घोषणा गरेका छन् ।

रास्वपा संस्थापक सदस्यसमेत रहेका बोहराले आज सामाजिक सञ्जालमार्फत आफ्नो उम्मेदवारी घोषणा गरेका हुन् ।

Watch On

बोहराले फेसबुकमा लेखेका छन्– ‘यदि तपाईंलाई लाग्छ कि संघर्षका कठिन दिनहरूमा तपाईंहरूसँगै उभिएको एउटा साथी केन्द्रीय समितिमा पुग्नुपर्छ, यदि तपाईंलाई लाग्छ कि पार्टीलाई अझ जनमुखी, अझ उत्तरदायी बनाउन मेरो भूमिका उपयोगी हुन सक्छ, भने मलाई आफ्नो अमूल्य मत दिनुहोस्। तपाईंको एक मत केवल दीपक बोहराका लागि होइन, संघर्षलाई सम्मान गर्ने, कार्यकर्ताको आवाजलाई केन्द्रसम्म पुर्‍याउने संकल्पका लागि हुनेछ।’

यस्तो छ दीपक बोहराको अपिल

म दीपक बोहरा, राष्ट्रिय स्वतन्त्र पार्टीको संस्थापक सदस्य।
आज म हामीले सँगै हिँडेको यात्राको सम्झना गर्न चाहन्छु । 
हामीले बोकेको वैकल्पिक राजनीतिको झन्डालाई कतिले जिस्काए, कतिले होच्याए । कतिले यसलाई केही महिनाको रहर भने । तर हामी डगमगाएनौँ।
संसद र सरकारमात्र होइन, न्यायपालिकाले समेत अन्याय गर्यो, सभापति रवि लामिछानेलाई । राजनीतिक प्रतिशोध साँधेर वर्षौँ जेलमा कोच्ने प्रयास भयो । विधिका सबै ढोकामा षड्यन्त्रको ताला लागेका बेला पनि हामीले मैदान छाड्नौं । हामी जनताको अदालतमा गयौं । मैले ४० लाख हस्ताक्षर संकलन अभियानको नेतृत्व गर्ने अवसर पाएँ। त्यो अभियानकुनै व्यक्तिलाई होइन, न्यायलाई नै न्याय दिने अभियान थियो । 
मलाई अझै सम्झना छ, सभापति अप्ठ्यारोमा रहेका बेला मैले भनेको थिएँ— जहाँ जहाँ घण्टीका उम्मेदवार छन्, त्यहाँ त्यहाँ जिताउने जिम्मा हाम्रो हो।
साथीहरू,
हामीले चुनाव जित्यौँ। जनताको मन जित्यौँ। तर अबको चुनौती अझ ठूलो छ। जनताले हामीमाथि राखेको विश्वास जोगाउनुपर्नेछ। नेतृत्वलाई सही बाटोमा हिँड्न प्रेरित गर्नुपर्नेछ। गलत हुँदा सच्याउनुपर्नेछ। सही हुँदा साथ दिनुपर्नेछ।
महाधिवेशन प्रतिनिधिज्यूहरू,
यदि तपाईंलाई लाग्छ कि संघर्षका कठिन दिनहरूमा तपाईंहरूसँगै उभिएको एउटा साथी केन्द्रीय समितिमा पुग्नुपर्छ, यदि तपाईंलाई लाग्छ कि पार्टीलाई अझ जनमुखी, अझ उत्तरदायी बनाउन मेरो भूमिका उपयोगी हुन सक्छ, भने मलाई आफ्नो अमूल्य मत दिनुहोस्।
तपाईंको एक मत केवल दीपक बोहराका लागि होइन, संघर्षलाई सम्मान गर्ने, कार्यकर्ताको आवाजलाई केन्द्रसम्म पुर्‍याउने संकल्पका लागि हुनेछ।
धन्यवाद।
जय घण्टी। जय राष्ट्रिय स्वतन्त्र पार्टी।