मेसीले तोडे क्लोजको १६ गोलको कीर्तिमान, टिमलाई पुर्याए नकआउटमा

काठमाडौं । कप्तान लियोनल मेसीले कीर्तिमानी १६ गोलको कीर्तिमान तोडेपछि अर्जेन्टिनाले फिफा विश्वकप २०२६ मा दोस्रो जित निकाल्दै अन्तिम ३२ मा स्थान बनाएको छ । 

आइतबार राति अमेरिकामा भएको खेलमा अर्जेन्टिनाले अस्ट्रियालाई २–० ले हरायो । ७० हजार समर्थकमाझ अर्जेन्टिनाको जितमा दुबै गोल मेसीले गरेका थिए । योसँगै दुई खेलमा अर्जेन्टिनाले गरेको पाँच गोल नै मेसीको नाममा रहेको छ ।

Watch On

मेसीले जर्मनीका मिरोस्लाभ क्लोजको नाममा रहेको १६ गोलको कीर्तिमान भंग गरेका हुन् । पहिलो खेलमा अल्जेरियाविरुद्ध मेसीले ३ गोल गर्दै १६ गोल बराबरी गरेका हुन् । दोस्रो खेलमा अस्ट्रियाविरुद्ध २ गोल गरे । यो विश्वकपमा ३८ वर्षीय मेसीले दुई खेलमा ५ गोल गर्दै सर्वाधिक गोलकर्ताको शीर्ष स्थानमा आपूmलाई उभ्याएका छन् । 

यो खेलसँगै मेसीले विश्वकपमा लगातार ६ गोल गर्ने खेलाडीको सूचीमा आफूलाई तेस्रो स्थानमा उभ्याएका छन् । यस्तै, ३८ वर्षको उमेरमा एकै विश्वकपमा पाँच गोल गर्ने कीर्तिमान पनि बनाए । यसअघि रोजर मिलाले सन् १९९० मा यो कीर्तिमान बनाएका थिए । 

अस्ट्रियाविरुद्ध मेसीले पहिलो हाफको ३८औं मिनेटमा पहिलो गोल गरेका थिए । डिफेन्डर फाकुन्डो मेडिनाको पासमा बक्सभित्रबाट मेसीले हानेको शक्तिशाली प्रहार सिधै गोल भएको थियो । दोस्रो गोल इन्जुरी समयमा भएको थियो । 

अस्ट्रियाविरुद्ध मेसीले नवौं मिनेटमा पाएको पेनाल्टी अवसर गुमाएका थिए । लौटारो मार्टिनेजलाई लडाएपछि पाएको पेनाल्टीलाई मेसीले प्रहार गरेपछि गोल हुन सकेन । मेसी ६ विश्वकप खेल्दा तेस्रो पटक पेनाल्टी गुमाउन पुगेका हुन् । यसअघि सन् २०१८ मा आयरल्यान्ड, सन् २०२२ मा पोल्यान्ड र सन् २०२६ मा अस्टियाविरुद्ध पेनाल्टी अवसर खेर फ्याल्न पुगेका छन् । 

समूह ‘जे’ मा लगातार दोस्रो जितपछि अर्जेन्टिना नकआउट चरणमा प्रवेश गरेको छ । अर्जेन्टिनाको २ खेलबाट ६ अंक जोड्यो । पराजित अस्ट्रिया ३ अंकसहित दोस्रो स्थानमा छ । अब, अर्जेन्टिनाले अस्ट्रियालाई हेड टु हेडमा पछि पारेको छ । समूहमा जोर्डन र अल्जेरियाले पहिलो खेल गुमाएकाले अंक जोड्न सकेका छैनन् । 

अब, अर्जेन्टिनाले समूहको अन्तिम खेलमा जोर्डनसँग खेल्ने तालिका छ । एसियाली मुलुक जोर्डन भने पहिलो पटक विश्वकप खेलिरहेको छ । अर्जेन्टिना लगातार दोस्रो पटक तथा समग्रमा चौथो पटक उपाधि जित्ने अभियानमा छ ।