रास्वपा सभापति लामिछाने र चिनियाँ राजदूतबीच भेटबार्ता, नारायणगढ बुटवल पैदल यात्राबारे छलफल

काठमाडाैँ । राष्ट्रिय स्वतन्त्र पार्टीका सभापति रवि लामिछाने र नेपालका लागि चिनियाँ राजदूत छेन् सोङ्बीच भेटघाट भएको छ । सभापति लामिछानेलाई भेट्न पार्टी कार्यालय वनस्थली पुगेका राजदूत सोङ्ले नारायणगढ बुटवल सडक खण्डमा रास्वपाले गरेको पैदल यात्राका बारेमा चासो राखेका थिए ।

Watch On

पूर्व पश्चिम राजमार्गअन्तर्गत नारायणगढ बुटवल सडक खण्डको स्तरोन्नतिमा भैरहेको ढिला सुस्ती र नागरिकले खेप्नु परेको सास्तीबारे सरकारको ध्यानाकर्षण गराउन भन्दै रास्वपाले पुस ९ गतेदेखि ११ गतेसम्म ११३ किलो मिटर पैदल यात्रा गरेको थियो । 

एसियाली विकास बैंकको ऋण सहयोगमा बन्नेगरी चीनियाँ निर्माण कम्पनी चाइना स्टेट कन्स्ट्रक्सन इन्जिनियरिङ कर्पोरेसनले ठेक्का लिएपनि कामले गति लिएको छैन । पैदल यात्राका क्रममा यात्रु र स्थानीयले सास्ती भोगेको भन्दै रास्वपा सभापतिले कडा प्रतिक्रिया दिएका थिए । त्यसको केही समय पछि बिहीबार राजुदत सोङ् लामिछानेलाई भेट्न पार्टी कार्यालय पुगेका हुन् ।

भेटमा रास्वपा सभापति लामिछानेले निर्माणस्थलका कामदार कम देखिएको भन्दै थपिएको समयमा पनि काम सम्पन्न हुने विषयमा शंका व्यक्त गरेका थिए । जवाफमा राजदुत सोङ्ले निर्माण ढिलाई हुनुको कारण समाधान गर्दै थपिएको समयमा निर्माण सम्पन्न गराउन चीनियाँ पक्षले आवश्यक पहल गरिरहेका बताएका थिए ।