प्रतिनिधिमा अझै किचलो, महाधिवेशन लम्बिने संकेत

चितवन । राष्ट्रिय स्वतन्त्र पार्टी (रास्वपा)को चितवनको भरतपुरमा जारी महाधिवेशनमा फेरि प्रतिनिधिको नामावलीलाई लिएर किचलो देखिएको छ ।

प्रतिनिधि नामावली विवादकै कारण एक दिन लम्बिएको महाधिवेशन थप लम्बिने सम्भावना बढेको छ ।

Watch On

निवर्तमान केन्द्रीय समितिका महामन्त्री कविन्द्र बुर्लाकोटीले महाधिवेशन प्रतिनिधिको सूचीमा केही नाम छुटेको गुनासो आएको र समस्या भए साढे तीन बजेभित्र उपलब्ध गराउन आग्रह गरिएको बताएका छन् ।

बुर्लाकोटीले फेसबुकमा लेखेका छन्– ‘महाधिवेशन प्रतिनिधिहरुको सूची तयार हुँदा अझै केही नाम छुटेको गुनासो आएकाले समाधान प्रयास भइरहेको र आफ्नो प्रदेशमा कुनै समस्या भए प्रदेश सभापति वा प्रदेश महामन्त्रीमार्फत सहजीकरणका लागि लिखित विवरण १ घण्टा (३ः३० बजे) भित्र उपलब्ध गराउन अनुरोध छ ।’

यसअघि निर्वाचन आयोगले हिजो ३ हजार ८ सय ४९ महाधिवेशन प्रतिनिधिहरुको नामावली सार्वजनिक गरेको थियो ।

९९ केन्द्रीय सदस्य पदमा हिजो राति नै उम्मेदवारी दर्ता भइसके पनि आयोगले अहिलेसम्म उम्मेदवारहरुको नामावली पनि सार्वजनिक गरेको छैन । उम्मेदवारको नाम टुंगो नलाग्दा मतदानका लागि तयार पारिएको विद्युतीय मतदान मेसिनमा प्रविष्ट पनि गरिएको छैन ।

आज साँझसम्म तयारी पूरा गरी राति मतदान गराउने तयारी आन्तरिक रुपमा भइरहेको जनाइएको छ ।

भोलि बिहान केन्द्रीय सदस्यहरुको निर्वाचन परिणाम सार्वजनिक गरेर भोलि नै पदाधिकारी चयनका लागि दोस्रो चरणको निर्वाचन गराउने आयोगको तयारी छ ।

पूर्वनिर्धारित तालिका अनुसार असार ७ गते आइतबार सुरु भएको महाधिवेशन असार ९ गते मंगलबार (हिजो) सम्पन्न भइसक्नु पर्ने थियो । आज महाधिवेशनको चौथो दिन हो । यस्तै अवस्था रहे भोलि पाँचौं दिन पनि महाधिवेशन चल्ने छ ।