रास्वपाले पदाधिकारीमा कम्तीमा चार महिला मनोनीत गर्ने, यस्तो छ तयारी

काठमाडौँ । राष्ट्रिय स्वतन्त्र पार्टीले केन्द्रीय पदाधिकारीमा चार जना महिना मनोनीत गर्ने भएको छ ।

रास्वपा महामन्त्री विपीन आचार्यले विधानबमोजिम कम्तीमा चार महिलालाई सभापतिले पदाधिकारीमा मनोनीत गर्ने बताए । 

Watch On

रास्वपाको प्रथम महाधिवेशनबाट सभापतिमा रबि लामिछाने, उपसभापतिमा स्वर्णिम वाग्ले र सोविता गौतम, महामन्त्रीमा विपीन आचार्य, सहमहामन्त्रीमा हरि ढकाल, असिम शाह र निशा डाँगी निर्वाचित भएका छन् । 

पदाधिकारीमा एक उपसभापति, एक महामन्त्री, दुई सहमहामन्त्री, एक कोषाध्यक्ष, दुई सहकोषाध्यक्ष, एक प्रवक्ता र तीन सहप्रवक्ता मनोनीत हुन बाँकी छ । मनोनीत पदमा कम्तीमा चार जना महिला र दुई जना खसआर्य बाहेकको कलस्टरबाट मनोनीत हुने महामन्त्री आचार्यले बताए । 'त्यो बाहेक पनि जे जे मिसिङ छ वा प्रतिनिधित्व छैन, त्यसलाई सभापतिज्यूले सम्बोधन गर्नुहुनेछ,' उनले भने । 

आचार्यले पदाधिकारीमा दुई महिला र एक मुस्लिमको प्रतिनिधित्व भएको र बाँकी कलस्टर समूहलाई मनोनीतका क्रममा सम्बोधन गरिने बताए । 

रास्वपा महाधिवेशनबाट ९९ जना केन्द्रीय सदस्य निर्वाचित भएका छन् । जसमा ४९ जना महिला छन् । अब सभापति ५१ जना मनोनीत गर्न बाँकी छ । केन्द्रीय सदस्यको मनोनयनमा पनि समावेशी समूहलाई ख्याल गरिने महामन्त्री आचार्यले बताए ।  

मनोनीत कहिले?

महामन्त्री आचार्यले पदाधिकारी र केन्द्रीय सदस्यको मनोनयन कहिले हुन्छ भन्ने टुंगो लागिनसकेको बताए । उनकाअनुसार पहिला निर्वाचित केन्द्रीय सदस्यको शपथ हुनेछ । शपथकै टुंगो लागेको छैन । 

शपथ गरेपछि केन्द्रीय समितिको पहिलो बैठक बस्नेछ । बैठकमा सभापतिले मनोनीत गर्ने केन्द्रीय सदस्यको नाम प्रस्ताव गर्नेछन् । बैठकले अनुमोदन गरेपछि मनोनीत हुनेछन् । त्यसपछि पदाधिकारी मनोनीत हुनेछ । किनकि पदाधिकारी हुन केन्द्रीय सदस्य हुनुपर्ने विधानको व्यवस्था छ । 

रास्वपा नेताहरुकाअनुसार निर्वाचित केन्द्रीय सदस्यहरुको शपथ असार १७ गते गर्ने तयारी भइरहेको छ । यद्यपि मिति तय भइसकेको छैन ।