हामी घाइते भएका हौं, मरेका होइनौंः ओली

काठमाडौं । नेकपा एमालेका अध्यक्ष केपी शर्मा ओलीले देश प्रतिगामी, फाँसीवादी बाटोमा जान नसक्ने बताएका छन् ।

नेकपा एमाले निर्वाचन समीक्षा तथा पार्टी पुनर्गठन कार्यदलद्वारा पार्टीको केन्द्रीय कार्यालय, च्यासलमा आयोजित सम्पर्क विशेष संगठन कमिटीसँग सुझाव संकलन कार्यक्रममा उनले फाँसीवादी प्रवृत्तिका विरुद्ध मिल्न सकिने सबै शक्ति मिलेर संयुक्त संघर्षमा जानुपर्ने आवश्यकता रहेको र ती शक्तिसँग कार्यगत एकता गरेर अगाडि बढ्नुपर्ने बताएका हुन् ।

Watch On

अध्यक्ष ओलीले एमाले देशव्यापीरुपमा फैलिएको, सुदृढ संगठन भएको, सही विचार र महान उद्देश्यका साथ अगाडि बढिरहेको पार्टी भएको दाबी गर्दै यसलाई थप सुदृढ र विस्तार गर्नुपर्ने बताए । उनले पार्टी एकीकरण गर्न आवश्यक नभएको पनि बताए ।

‘पार्टी एकताको कुरा कहाँबाट आयो ? ओलीले भने ‘एमालेको नीति, विचार, उद्देश्य बोकेर अगाडि बढ्न चाहने व्यक्तिहरू लिन सक्छौं, पार्टीगत एकताको चरणमा अहिले हामी छैनौं ।’

गएको चुनावमा पार्टीले गम्भीर धक्का खाएको तर, उठ्नै नसक्ने अवस्थामा भने पुगिनसकेको ओलीको भनाइ छ । उनले भने– ‘हामी अलिकति घाइते भएका हौं, मरेका छैनौं, हामी उठ्न सक्छौं ।’

सुझाव संकलन कार्यक्रममा पार्टीका उपाध्यक्ष एवं निर्वाचन समीक्षा तथा पार्टी पुनर्गठन कार्यदलका संयोजक रामबहादुर थापा ‘बादल’, उपाध्यक्ष पृथ्वीसुब्बा गुरुङ, महासचिव शंकर पोखरेल, पार्टीका नेता लालबाबु पण्डित लगायतको उपस्थिति थियो।