गार्मेन्टका सामान भन्दै कुरियरमार्फत विदेश लैजान लागिएको सुनचाँदीका गहना बरामद

काठमाडौँ । गार्मेन्टका सामान भन्दै कुरियरमार्फत विदेश पठाउन लागिएको ८१ लाख ७२ हजार ३९३ रुपैयाँबढीको सुनचाँदीका गहना बरामद गरिएको छ ।

त्रिभुवन अन्तर्राष्ट्रिय विमानस्थल भन्सार कार्यालयबाट खटिएका प्रहरीले सुनचाँदीका गहना बरामद गरेका हुन्। बरामद सुनको कुल तौल २८५.१७८ ग्राम रहेको छ, जसको मूल्य ६७ लाख ३४ हजार ३५० रुपैयाँ रहेको छ।

Watch On

त्यसैगरी चाँदीको कुल तौल ३ केजी ९१४.६५० ग्राम रहेको छ, जसको मूल्य १४ लाख ३८ हजार ४३ रुपैयाँ निर्धारण गरिएको छ। बरामद सुन तथा चाँदीको कुल मूल्य ८१ लाख ७२ हजार ३९३ रुपैयाँ रहेको जनाइएको छ।

गार्मेन्टको सामान भन्दै कुरियरमार्फत विदेश पठाउन लागिएको सामान चेकजाँच गर्ने क्रममा ठूलो परिमाणमा सो सुनचाँदी बरामद भएको थियो ।
बुधबार जुत्ता, पाइन्ट, सारी तथा अन्य कपडाहरू रहेको भन्दै पठाउन लागिएको पार्सलबाट सुन तथा चाँदीका गरगहना बरामद गरिएको गरगहनाको आज(बिहीबार) काठमाडौं सुनचाँदी व्यवसायी संघ, क्षेत्रपाटीमा परीक्षण गरिएको थियो।

वैध रूपमा खरिद गरिएको सुन तथा चाँदी घोषणा (डिक्लेयर) गरेर लैजान सकिने व्यवस्था हुँदाहुँदै गार्मेन्टका सामानका रूपमा लुकाइछिपाइ कुरियरमार्फत पठाउन खोजिएको प्रारम्भिक अनुसन्धानबाट खुलेको छ।

घटनाका विषयमा त्रिभुवन अन्तर्राष्ट्रिय विमानस्थल भन्सार कार्यालय, गौचरले थप अनुसन्धान गरिरहेको जनाएको छ।