रास्वपाले अब सांसदहरूको कामको डिजिटल ट्रयाकिङ गर्ने, ल्यायो 'पल्स आरएसपी'

काठमाडौँ । राष्ट्रिय स्वतन्त्र पार्टीले आफ्ना सांसदहरुको डिजिटल ट्रयाकिङ गर्ने भएको छ । 

पार्टीलाई डिजिटल बनाउँदै लैजाने प्रकृयाअन्तर्गत रास्वपाले सांसदहरुलाई ट्रयाकिङ गर्न पल्स आरएसपी नामक सिस्टम नै निर्माण गरेको छ । 

Watch On

उक्त सिस्टमबारे सांसदहरुलाई जानकारी दिन रास्वपाले आज दलको कार्यालयमा बैठक राखेको छ । सभापति रबि लामिछानेको उपस्थितिमा सिंहदरबारस्थित संसदीय दलकाे कार्यालयमा विहान साढे १० बजे बस्ने बैठकमा साइबर सुरक्षासम्बन्धी सचेतना समेत दिने दलका मुख्य सचेतक कविन्द्र बुर्लाकोटीले बताए । 

के हो पल्स आरएसपी ? 

मुख्य सचेतक बुर्लाकोटीकाअनुसार पल्स आरएसपी सिस्टमले सांसदहरुका गतिविधिलाई प्रत्यक्ष रुपमा अपडेट गराउनेछ । 

यसका लागि हरेक सांसदले आफ्ना गतिविधि अनिवार्य सिस्टममा अपडेट गराउनुपर्नेछ । साथै एकअर्कासँग भेटघाटका लागि अनलाइनबाटै समय माग गर्न सकिनेछ । संसदमा बोल्ने विषयवस्तु समेत सोही सिस्टममा अपडेट हुनुपर्नेछ ।  

निर्वाचन क्षेत्रमा भएका भ्रमण, भेटघाटजस्ता कार्यक्रमको जानकारी समेत सोही पोर्टलमा गराउनुपर्नेछ । 

नागरिकले सम्बन्धित निर्वाचन क्षेत्रका सांसदसँग त्यही माध्यमबाट गुनासा राख्न सक्ने र त्यसको ट्रयाकिङ हुने र त्यसकै आधारमा सांसदको कार्यसम्पादन मूल्याङ्कन हुने जस्ता फिचरहरु रहेको मुख्य सचेतक बुर्लाकोटीले बताए ।