एमाले पुनर्गठन सुझाव कार्यदलको बैठक असार २२ गते

काठमाडौँ । नेकपा एमालेको पुनर्गठन सुझाव कार्यदलको बैठक असार २२ गते बस्ने भएको छ । 

सबै प्रदेश, जनसंगठन र विभागहरूसँग छलफलपछि कार्यदलको बैठक आगामी सोमबार बोलाउन लागिएको एमाले प्रचार विभाग प्रमुख निरज आचार्यले जानकारी दिए । 

Watch On

उनकाअनुसार कार्यदलले ८ वटा भौगोलिक, एउटा गैरभौगोलिक, सबै जनसंगठनहरूसँग सुझाव लिइसकेको छ । आज शुक्रबार विभाग र केन्द्रीय निकायहरुसँग कार्यदलले छलफल गर्दैछ । 

कार्यदलका एक सदस्यकाअनुसार अधिकांश प्रदेशबाट प्रतिनिधित्व गर्ने केन्द्रीय सदस्यहरू, सम्बन्धित प्रदेशका पदाधिकारी र जिल्ला नेताहरू पुनर्गठनको पक्षमा खुलेका छन् । 'प्रदेशहरूका ७० प्रतिशतभन्दा बढी सदस्यहरू पुनर्गठनको पक्षमा खुलेका छन् । पार्टी यथास्थितिमा अगाडि बढ्न नसक्ने, केपी ओलीलाई नै अध्यक्षमा यथावत् राखेर जाँदा तलबाट पार्टी उठाउन नसकिने धारणा प्रदेश पदाधिकारी र जिल्ला तहका नेताबाट आएको छ,' ती सदस्यले भने, 'जनसंगठनतर्फ पनि पार्टीको यही नेतृत्वलाई कायम राखेर जाँदा संगठन विस्तार गर्न कठिन हुने धारणा राख्नुभएको छ ।'  

ती सदस्यले तलबाट आएका सबै सुझावहरूलाई एकीकृत गरेर प्रतिवेदनको रुप दिइने बताए । गत जेठ १० गते सकिएको एमाले केन्द्रीय सचिवालयको आठौं बैठकले पार्टीलाई पुनर्गठन गर्ने विषयमा तलबाट सुझाव माग्नेगरी उपाध्यक्ष रामबहादुर थापा बादलको नेतृत्वमा पदाधिकारी तहका सात र ८ प्रदेश इन्चार्जहरु रहेको कार्यदल गठन गरेको थियो । कार्यदलले ८ वटै प्रदेश स्तरका कमिटी, जनसंगठनहरूबाट छुट्टाछुट्टै सुझाव लिएको थियो । कार्यदलले सुझाव लिनुअघि अध्यक्ष ओलीले सातवटा प्रदेशलाई जुम मार्फत सम्बोधन गरेका थिए । बागमती प्रदेशमा भने कार्यदलसँगको छलफलपछि केन्द्रीय सदस्य एवं प्रदेश र जिल्ला तहका नेताहरूलाई गुण्डुस्थित निवासमै बोलाएर छलफल गरेका थिए । 

पुनर्गठनको पक्षमा माहोल कमजाेर बनाेस् भन्ने ध्येयले अध्यक्ष ओलीले कार्यदलको बैठक अगाडि सम्बोधन गरेर छलफल प्रभावित गर्न खोजेको पनि कार्यदलका सदस्यले बताएका छन् । तथापि पुनर्गठनको पक्षमा तलबाट माहोल तयार भएकाले सोहीअनुरुप प्रतिवेदन तयार हुने कार्यदलका सदस्यहरूको भनाइ छ । 

यसैबीच अध्यक्ष ओलीले सामाजिक सञ्जाल र सार्वजनिक ठाउँमा पार्टी र नेतृत्वविरुद्ध जथाभावी लेख्नेलाई कारवाही गर्ने चेतावनी दिएका छन् । बिहीबार जनसंगठनहरूसँगको छलफलमा अध्यक्ष ओलीले त्यसरी सामाजिक सञ्जालमा लेखे कारवाही गरिने बताएका हुन् ।

उनले पार्टी नयाँ ढंगले अगाडि बढाउन अहिले चलिरहेको एकताको हल्ला निराधार रहेको र तत्काल पार्टी एकताको सम्भावना नरहेको बताएका थिए ।