राष्ट्रिय सभाबाट विनियोजन विधेयक पारित हुँदै, ९ मन्त्रीले जवाफ दिने

काठमाडौँ । राष्ट्रिय सभाबाट आज बजेटसम्बन्धी विनियोजन विधेयक पारित हुँदैछ ।

आज दिउँसो १२:१५ बजे बस्ने बैठकमा ९ जना मन्त्रीले विनियोजन विधेयकअन्तर्गत मन्त्रालयगत शीर्षकमा उठेका प्रश्नको जवाफ दिने र विधेयक पारित गर्ने कार्यसूची रहेको संसद सचिवालयले जनाएको छ । 

Watch On

सचिवालयकाअनुसार आजको बैठकमा उद्योग, वाणिज्य तथा आपूर्ति मन्त्री गौरीकुमारी यादव, कृषि, वन तथा पर्यावरण मन्त्री गीता चौधरी, पूर्वाधार विकास मन्त्री सुनिल लम्साल, गृहमन्त्री सुधन गुरुङ, उर्जा, जलस्रोत तथा सिँचाइ मन्त्री विराजभक्त श्रेष्ठ, परराष्ट्र मन्त्री शिशिर खनाल, अर्थमन्त्री स्वर्णिम वाग्लेले जवाफ दिने कार्यसूची छ । 

बैठकमा प्रधानमन्त्री बालेन्द्र शाहको तर्फबाट रक्षा मन्त्रालय, राष्ट्रपति कार्यालय, उपराष्ट्रपतिको कार्यालय, प्रधानमन्त्री तथा मन्त्रिपरिषद्को कार्यालय, राष्ट्रिय योजना आयोगको सचिवालयसम्बन्धी जिज्ञासाको जवाफ अर्थमन्त्री वाग्लेले दिने कार्यसूची छ । 

जवाफपछि विनियोजन विधेयकअन्तर्गत विभिन्न शीर्षकहरुमा सांसदहरुले राखेका खर्च कटौतीका प्रस्तावहरुलाई अध्यक्ष नारायण दाहालले निर्णयार्थ प्रस्तुत गर्नेछन् । 

त्यसपछि अर्थमन्त्री डा. वाग्लेले प्रतिनिधि सभाबाट सन्देशसहित प्राप्त विनियोजन विधेयकलाई पारित गरियोस् भन्ने प्रस्ताव प्रस्तुत गर्नेछन् । त्यसपछि सभाले पारित गर्नेछ । 

आजको बैठकमा अर्थमन्त्री वाग्लेले प्रतिनिधिसभामा सन्देशसहित प्राप्त बजेटसम्बन्धी आर्थिक विधेयक र राष्ट्र ऋण उठाउने विधेयकमाथि विचार गरियोस् भन्ने प्रस्ताव प्रस्तुत गर्ने कार्यसूची छ ।