राष्ट्रिय सभाले आज बजेट पारित गर्दै

काठमाडौँ । राष्ट्रिय सभाले आज आगामी आर्थिक वर्ष २०८३/०८४ को वार्षिक बजेट आश्रित विधेयक पारित गर्दैछ । 

दिउँसो १२ बजेर १५ मिनेटमा बस्ने बैठकले बजेट आश्रित आर्थिक विधेयक र राष्ट्र ऋण उठाउने विधेयक पारित गर्ने कार्यसूची रहेको संसद् सचिवालयले जनाएको छ । 

Watch On

राष्ट्रिय सभाले बजेटको मन्त्रालय शीर्षकहरु रहेको विनियोजन विधेयक मंगलबार पारित गरेर प्रतिनिधि सभामा फिर्ता पठाइसकेको छ । 

आजको बैठकमा आर्थिक विधेयक र राष्ट्र ऋण उठाउने विधेयकमा दफावार छलफल गरी पारित गर्ने कार्यसूची छ । अर्थमन्त्री डा. स्वर्णिम वाग्लेले विधेयकहरु प्रस्तुत गर्नेछन् । 

बजेट आश्रित तीनवटा विधेयक दुबै सभाबाट पारित भएपछि प्रमाणीकरण भएर साउन १ बाट लागु हुनेछ । 

आजको बैठकमा अध्यादेश प्रतिस्थापन विधेयकहरुका सम्बन्धमा विधायन समितिको प्रतिवेदन पनि पेस हुनेछ । चारवटा अध्यादेश प्रतिस्धापन गर्न सरकारले ल्याएको विधेयक प्रतिनिधिसभाबाट पारित भई राष्ट्रियसभामा पुगेको छ । चारवटै अध्यादेश सभाले समितिमा पठाएकोमा आज समिति सभापति कृष्णबहादुर रोकायले प्रतिवेदन पेश गर्नेछन् । 

संसद सचिवालयकाअनुसार सार्वजनिक खरिद (दोस्रो संशोधन) विधेयक, सम्पत्ति शुद्धीकरण (मनी लाउण्डरिङ्ग) निवारण (तेस्रो संशोधन) विधेयक, सहकारी (पहिलो संशोधन) विधेयक र स्वास्थ्य विज्ञान प्रतिष्ठान सम्बन्धी केही नेपाल ऐनलाई संशोधन गर्ने विधेयकमाथिको समितिको प्रतिवेदन पेस गरिनेछ ।