कांग्रेसले प्रधानमन्त्रीलाई सदनमै श्री ८ भनेकामा रास्वपा सांसदको आपत्ति

काठमाडौँ । प्रमुख प्रतिपक्षी नेपाली कांग्रेसका सांसदले प्रधानमन्त्री बालेन्द्र शाहलाई श्री ८ भनेकोमा रास्वपा सांसदले आपत्ति जनाएका छन् । 

प्रतिनिधि सभाको मंगलबारको बैठकमा रास्वपाबाट निर्वाचित जेन जी सांसद शिवशंकर यादवले प्रधानमन्त्रीलाई श्री ८ भन्ने कांग्रेस सचेतक निश्कल राईको अभिव्यक्तिमा नियमापत्ति गरेका हुन् । 

Watch On

राईले सरकार प्रश्न गर्नेलाई रोक्न खोजिरहेको र प्रधानमन्त्री श्री ८ बन्न खोजिरहेको टिप्पणी गरेका थिए ।

'गणेश नेपाली आत्मदाह, मिडिया हाउस र नेताका घरअगाडि गाडी पार्किङ र सुकुम्बासीको बिचल्लीमा प्रश्न उठाउनेमिथ भएको दुर्व्यवहारलगायत यी सबै कुराको मूल मर्म भनेको नेपाली समाजमा प्रश्न बर्जित छ भन्ने हो। सरकारले खासगरी श्री ८ बालेन्द्र शाहलाई प्रश्न गर्न पाइँदैन भनेर स्थापित गर्न खोजिरहेको छ। यतिसम्म कि देशमा रहेको संविधान र कानुनको परिधिभित्र रहेर उत्पन्न हुने प्रश्नभन्दा माथि श्री ८ हुनुहुन्छ भनेर आम नागरिकलाई चेतावनी यो सरकारले दिइरहेको छ,' उनले भनेका थिए । 

राईको उक्त अभिव्यक्तिमा रास्वपा सांसद यादवले संघीय लोकतान्त्रिक गणतन्त्रात्मक संविधानले श्री ८ नस्वीकार्ने भन्दै रेकर्डबाट हटाउन माग गरेका हुन् ।

'जुन हिसाबले अघिल्ला माननीयले सम्माननीय प्रधानमन्त्री बालेन्द्र शाहज्यूलाई जुन एउटा श्री ८ को भाषाले सम्बोधन गर्नुभएको छ । त्यसलाई संविधानले स्वीकार्दैन । त्यसैले यो सदनले त्यो भाषा स्वीकार्दैन । त्यसैले रेकर्डबाट हटाउन माग गर्दछु,' उनले भने ।

रास्वपाको सांसदको नियमापत्तिमा सभामुख डोलप्रसाद अर्यालले कुनै ध्यानाकर्षण जनाएनन् ।