समाज

माइतीघरमा गोलभेंडा आन्दोलन

सिधाकुरा

बुधबार, असार ३१, २०८३

काठमाडौँ । उत्पादनको उचित मूल्य नपाएको भन्दै काठमाडौँ आसपासका तरकारी उत्पादक किसानले माइतीघर मण्डलमा आज गोलभेंडा (टमाटर) सडकमै फालेर विरोध जनाएका छन् । आफूहरुले दुःख गरेर उब्जाएको तरकारीको उचित मूल्य नपाएको उनीहरुको गुनासो थियो ।

सरकारले किसानलाई पर्याप्त अनुदान, उत्पादनको उचित मूल्य र बजारको सुनिश्चितता गर्न नसकेको तथा आयातमुखी नीतिका कारण स्वदेशी किसान मारमा परेको भन्दै आफूहरू आन्दोलनमा उत्रिनु परेको आन्दोलनमा सहभागी एक किसानले बताए ।

Watch On

‘हामीले उत्पादन गरेको टमाटर लामो समयसम्म बिक्री हुँदैन, उत्पादनको लागतसमेत उठाउन कठिन भएको छ र सरकारले किसानका समस्या समाधानमा बेवास्ता गरेकाले आन्दोलनमा आउन बाध्य भएका हौँ’ उनले भने ।

हरेक कृषि उत्पादनको न्यूनतम समर्थन मूल्य निर्धारण, उत्पादनमा अनुदान वृद्धि, मल–बीउको सहज उपलब्धता, बजार व्यवस्थापन तथा स्वदेशी उत्पादनलाई प्राथमिकता दिने नीति तत्काल लागू गर्न उनीहरुले सरकारसँग माग गरेका छन् ।

बजारमा पठाउन तयार भएको तरकारी बिचौलियाले आफूहरूसँग थोरै पैसामा खरिद गर्ने र उपभोक्तालाई महँगो मूल्यमा बेच्ने गरेको गुनासो पनि उनीहरुको छ । किसानको गरेको उत्पादनलाई सिधै उपभोक्तासँग जोड्न सरकारले सहयोग गर्नुपर्ने उनीहरुको माग छ।

प्रकाशित मिति: बुधबार, असार ३१, २०८३

प्रतिक्रिया दिनुहोस्