सुनिल पौडेलले ३ करोड घुस लिएको ठहर, आठ वर्ष ६ महिना कैद सजाय

काठमाडौँ । राष्ट्रिय सूचना प्रविधि केन्द्रका पूर्वकार्यकारी निर्देशक सुनिल पौडेललाई घुस लिएको मुद्दामा आठ वर्ष ६ महिना कैद सजाय भएको छ।

केन्द्रका लागि ‘सेक्युरिटी अप्लायन्स र नेटवर्क इक्विपमेन्ट’ को खरिद गर्दा २ लाख ८० हजार अमेरिकी डलर बराबर घुस लिएको मुद्दामा विशेष अदालतले पौडेललाई विशेष अदालतले दोषी ठहर गर्दै आठ वर्ष कैद सजाय सुनाएको हो।

Watch On

उक्त रकम नेपाली रूपैयाँ अनुसार ३ करोड ८ लाख ५० हजार ४०० रुपैयाँ हुन्छ।

न्यायाधीशहरू सुदर्शनदेव भट्ट, हेमन्त रावल र डिल्लीरत्न श्रेष्ठको इजलासले बिहीबार उनलाई सजाय निर्धारण गरेको हो।

उनले प्रविधि केन्द्रमा कार्यकारी निर्देशक हुँदा घुस लिएको भन्दै इजलासले थप ६ महिना कैद सजाय सुनाएको हो।

अदालतले पौडेलसँगै घुस दिने कार्यमा संलग्न दिपक आनन्दलाई पनि दोषी ठहर गरेको छ। आनन्द भारतीय नागरिक हुन्।

दुई जनाविरूद्ध कायम भएको ३ करोड ८ लाख ५० हजार ४०० रुपैयाँको दामासाही हुने जनही एक करोड ५४ लाख २५ हजार २०० रुपैयाँ जरिवाना हुने फैसला भएको हो।

त्यस्तै उनीहरूबाट ६ लाख १७ हजार ८ रुपैयाँ पीडित राहत कोषमा जम्मा गर्न आदेश गरेको छ।

यसअघि विशेष अदालतले मंगलबार गैरकानुनी रूपमा सम्पत्ति आर्जन गरेको कसुरमा उनलाई साढे २ वर्षको कैद सजाय सुनाएको थियो। उनी नेपाल टेलिकमका पूर्व प्रबन्ध निर्देशकको रूपमा रहँदा गैरकानुनी रूपमा सम्पत्ति आर्जन गरेको भन्दै उक्त सजाय सुनाएको थियो।