शुक्लाफाँटामा हराएका १४ महिला रातभरि बसेका थिए रुखको ओतमा

काठमाडौँ । कञ्चनपुरको शुक्लाफाँटा राष्ट्रिय निकुञ्जभित्र च्याउ टिप्न गएका १४ महिलालाई नेपाली सेना, सशस्त्र र नेपाल प्रहरीले सोमबार मध्याह्‌न उद्धार गरेको छ । 

कञ्चनपुरका प्रमुख जिल्ला अधिकारी मदन कोइरालाका अनुसार भीमदत्त नगरपालिका–१९ बागफाँटाका १४ जना महिलाहरु च्याउ खोज्न भन्दै निकुञ्ज क्षेत्र प्रवेश गरेका थिए । तर वर्षात, कुहिरोका कारण बाटो भुलेपछि जंगलको बीचमै हराउन पुगेका थिए । ‘उहाँहरु स्थानीय नै भए पनि वर्षात र कुहिरोका कारण बाटो पत्ता लगाउन सक्नुभएनछ । बाटो खोज्दा खोज्दै रात परेपछि रूखको ओत लाग्नुभएछ,’ उनले भने । 

Watch On

उनका अनुसार सम्पर्कविहीन महिलाहरुको खोजीका लागि नेपाली सेना, सशस्त्र र नेपाल प्रहरी गरी १४० जना सुरक्षाकर्मी परिचालन गरिएको थियो । ठूलो संख्यामा स्थानीयहरु पनि खोजतलासमा सक्रिय थिए । उनीहरु आइतबार रातिदेखि नै परिचालित भए पनि महिलाहरु सोमबार मध्याह्‌नपख सम्पर्कमा आएको प्रजिअ कोइरालाले बताए । 

शुक्लाफाँटा राष्ट्रिय निकुञ्ज सुरक्षार्थ खटिएका  रणसिंह दल गणका गणपति प्रमुख सेनानी प्रकाश घिमिरेले पनि महिलाहरु परिवारको सर्म्पकमा आइसकेको जानकारी दिए । ‘सबै संयन्त्र परिचालन गरेर निकुञ्जभित्र खोजीकार्य व्यापाक पारिएको थियो,’ उनले भने, ‘केहीबेर अघि परिवारको सर्म्पकमा आएको र सबै सुरक्षित रहेको खबर प्राप्त भयो ।’

आइतबार साझँदेखि नै निकुञ्जभित्र हराइरहेका बेल्डाडी गाउँपालिका–२ का तीन जना महिलालाई भने गणका सहसेनानी सुमन जिसी नेतृत्वको टिमले उद्धार गरेको थियो ।     

उनीहरुलाई सोमबार बिहान सकुशल उद्धार गरी परिवारको जिम्मामा सुम्पिएको छ । निकुञ्जमा अवैध च्याउ टिप्न गएका तीन वटा महिला समूह सर्म्पकविहीन हुँदा सेना, प्रहरी, सशस्त्र प्रहरी, नगर प्रहरी र निकुञ्ज प्रशासन खोजीकार्यमा जुटेका थिए ।