अब सांसदहरूले स्वकीय सचिव राख्न पाउने, कति पाउँछन् तलब ?

काठमाडौँ । अब सांसदहरूले स्वकीय सचिव नियुक्त गर्ने बाटो खुलेको छ  । 

नेपाल राजपत्रमा सूचना प्रकाशन भएसँगै अब सांसदहरूले स्वकीय सचिव नियुक्त गर्न सक्ने छन् । 

Watch On

सरकारले संंघीय संसद्का पदाधिकारी तथा सदस्यहरूको पारिश्रमिक र सुविधा सम्बन्धी ऐन, २०७३ को दफा २५ अनुसार अनुसूचीमा हेरफेर गर्दै स्वकीय सचिवको सुविधा दिने निर्णय गरेको थियो ।

यो निर्णय नेपाल राजपत्रमा प्रकाशन भएसँगै अब सांसदहरूले स्वकिय सचिवको सुविधा पाउनेछन ।

कानून न्याय तथा संसदीय मामिला मन्त्रालयका अनुसार संघीय संसदका सदस्यहरूले रा.प.तृतीय (शाखा अधिकृत) श्रेणीको स्वकीय राख्न पाउनेछन् ।

यस्तै सभामुख र राष्ट्रियसभा अध्यक्षले रा.प.प्र (सहसचिव) सरहको प्रमुख स्वकीय सचिव १ जना राख्न पाउने व्यवस्था गरिएको छ । यस्तै स्वकीय द्वितीय श्रेणी (उपसचिव) र तृतीय श्रेणी (शाखा अधिकृत) को गरी दुई जना राख्न पाउनेछन् ।

विपक्षी दलको नेता, उपसभामुख, उपाध्यक्ष, प्रमुख सचेतकहरू र सभापतिले पनि द्वितीय श्रेणी (उपसचिव) को स्वकीय राख्न पाउने व्यवस्था लागू भएको हो ।

उनीहरूले सुरु स्केल अनुसारको तलब मात्र पाउने उल्लेख गरिएको छ । शाखा अधिकृतको सुरु स्केल तलब ४३ हजार ६८८, उपसचिवको तलब ४८ हजार ७३७, सहसचिवको तलब ५६ हजार ७८७ रहेको छ । यो तलब  स्केलमा यो आर्थिक वर्षदेखि १० प्रतिशतले वृद्धि भएको छ । 

स्वकीय सचिवालयका कर्मचारीले ऐनअनुसार प्राप्त गर्ने पारिश्रमिक बैंक खातामा उपलब्ध गराइने राजपत्रमा उल्लेख छ ।