माइतीघर डुबानबारे सडक विभागले पत्ता लगाएको कारण

काठमाडौँ । काठमाडौँ महानगरपालिकाका कार्यवाहक प्रमुख सुनीता डंगोलले माइतीघर क्षेत्रको डुवानको प्राविधिक कारणसहित प्रतिवेदन पेस गर्न साझेदार कार्यालयका अधिकारीहरुलाई निर्देशन दिएकी छन् । मंगलबार साँझ डुवान हुने क्षेत्रको अनुगमन गर्दै विपद जोखिम न्यूनीकरण तथा व्यवस्थापन प्राधिकरण, काठमाडौं उपत्यका खानेपानी लिमिटेड, डिभिजन सडक कार्यालय काठमाडौं र महानगरपालिकाका सम्बन्धित विभागको टोलीलाई प्रतिवेदन पेश गर्न निर्देशन दिएको उनको सचिवालयले जानकारी दियो ।

अनुगमनमा उपत्यका ट्राफिक प्रहरी कार्यालय, काठमाडौं महानगरपालिकाको विपद व्यवस्थापन विभाग, सार्वजनिक निर्माण विभाग, सहरी योजना आयोग, महानगर प्रहरी बलका अधिकारी लगायत थिए । 
सडक विभागका अधिकारीले साँघुरो ढल निकासका कारण माइतीघर क्षेत्र डुबानमा पर्ने गरेको बताए ।

Watch On

उनका अनुसार माइतीघर क्षेत्रमा ९० सेन्टिमिटरको ढल राखिएको छ। निकास हुने ठाउँमा ६० सेन्टिमिटरको ढल छ ।

‘प्रारम्भिक कारण यही हो । तर कारण यति मात्र होइन,’ उनले भने ।

अधिकारीहरूले माइतीघर मण्डला क्षेत्र वरिपरि भवन संरचना निर्माण गर्दा ढल निकास प्रणालीमा अवरोध पुर्‍याएको बताउँदै यस प्रकारका अवरोध हटाउनु पर्ने बताएकी छन् ।

अनुगमनका क्रममा कार्यवाहक प्रमुख डंगोलले, स्थानीय प्रशासनसहित पूर्वाधार निर्माण तथा सुविधा वितरणसँग सम्बन्धित साझेदारसँगको सहकार्यमा माइतीघर मण्डला क्षेत्रको ढल प्रणालीमा देखिएका सबै प्रकारका अवरोध हटाइ डुवान मुक्त बनाइने जानकारी दिइन् ।

५० मिलिमिटर पानी पर्दा माइतीघर जलमय, यस्ता छन् कारण
बिहीबार अपराह्न चार बजेदेखि पाँच बजेको अवधिमा बबरमहल क्षेत्रमा झण्डै ५० मिलिमिटर पानी पर्‍यो । छोटो अवधिमा परेको यो उल्लेख्य वर्षा हो । जल तथा मौसम विज्ञान विभागले यसलाई धेरै भारी वर्षा भन्ने गरेको छ । यो धेरै भारी वर्षाका कारण माइतीघर क्षेत्र डुबानमा पर्‍यो ।

काठमाडौँ उपत्यका ट्राफिक प्रहरी कार्यालयका सूचना अधिकारी एवं प्रवक्ता नरेशराज सुवेदीकाअनुसार माइतीघरदेखि सर्वोच्च अदालत परिसरसम्म सडकमा जमेको पानीले त्यसक्षेत्रको यातायात अस्तव्यस्त बन्यो । झण्डै ६ बजेसम्म करिब ४५ मिनेट सवारी आवागमन प्रभावित बनेको कैयन सवारीलाई डाइभर्सन गर्नुपरेको सुवेदीले बताए ।

जल तथा मौसम विज्ञान विभागका अनुसार बबरमहल क्षेत्रमा धेरै पछि यस्तो वर्षा मापन भएको थियो । २०८१ असोज १० देखि १२ गतेसम्म काठमाडौ उपत्यकाका झण्डै ११ स्थानमा रेकर्ड ब्रेक वर्षा भएको थियो । तर कतै पनि एक घण्टाको अवधिमा ५० मिलिमिटर र सोभन्दा माथि वर्षा भएको थिएन । यसपटक छोटो अवधिमा घनघोर वर्षा भएको छ ।

बबरमहल क्षेत्रमा परेको पानीले यातायात नै प्रभावित हुने गरी सडकमा पानी कसरी जम्यो र ट्राफिक प्रहरीको अवलोकन के छ भनेर हामीले ट्राफिक प्रहरी प्रवक्ता एसपी सुवेदीलाई सोध्यौ । उनकाअनुसार काठमाडौँमा एक झर पानी पर्दा नै धेरै ठाउँमा समस्या हुने गरेको छ ।

सामान्य पानी पर्दा पनि सडकमा पानी जम्ने, यातायात प्रभावित हुने भएपछि केही दिन पहिले उपत्यका ट्राफिक प्रहरी कार्यालय प्रमुख एसएसपी सुरेशप्रसाद काफ्लेसहित प्राविधिक टोली निरीक्षणका लागि निस्केको थियो । उक्त टोलीले दुई तीन वटा कारण पत्ता लगाएको सुवेदीले बताए ।

उनकाअनुसार पछिल्लो समय बागमती, यसका सहायक नदीहरुमा गेग्रान थुप्रिएको छ । बागमतीको माथिल्लो जलाधारमा ठूलो पहिरो र अरु निर्माण कार्य भइरहेको त छैन । तर काठमाडौँ उपत्यकामा भने पूर्वाधार निर्माणका काम भइरहेको छ । खासगरी तार भूमिगत गर्ने, चक्रपथ विस्तार, खानेपानी तथा ढल सञ्जाल विस्तार गर्दा ती ठाउँबाट निस्किएको ढुंगा, माटो आदिलाई बगाएर नदीमा पुर्‍याउँदा बागमती नदीमा थेग्रिने थुप्रिएको छ । जसले वर्षातको भेललाई सहजै बग्न नदिएको सुवेदीले बताए । 

यस्तै काठमाडौँ उपत्यकामा पूर्वाधार निर्माण गर्दा निस्किएको माटो बालुवाले कतिपय स्थानमा ढलहरुको मुख टालिएका छन् । कतिपय ढलहरुमा जथाभावी फालिएका फोहोरहरु गएर बस्ने र मुख टालिने हुँदा पानीले सहज निकास पाउन सकेको छैन । '

एसएसपी सुरेशप्रसाद काफ्लेसहितको प्राविधिक टोलीले बागमती नदीमा गेग्रान थुप्रिएर बहावमा अवरोध पुगेको निचोड निकालेको छ । यस्तै काठमाडौँ उपत्यकाको ढल सञ्जाल कतिपय ठाउँमा टालिएकाले निकासमा अवरोध पुगेको हाम्रो बुझाइ छ । हामीले समबन्धित निकायलाई यसबारे ध्यानाकर्षण गराएका छौं । यो नयाँ समस्या होइन,' सुवेदीले भने ।