भूमि समस्या समाधान समितिले २९ सुकुम्बासीलाई भन्यो– जग्गा लिन आफ्नै पालिकामा सम्पर्क गर्नू

काठमाडौँ । भूमि समस्या समाधान समितिले सूचना प्रकाशित गर्दै काठमाडौंका नदीनाला किनारबाट हटाइएकामध्ये पहिचान भएका २९ जना सुकुम्बासीलाई आफ्नै गृहजिल्ला फर्किएर पालिकासँग सम्पर्क गर्न भनेको छ ।

समितिले बुधबार सूचना प्रकाशित गरी काठमाडौं उपत्यकाका जिल्लासहित होल्डिङ सेन्टरमा रहेका ३८८ मध्ये २९ परिवारलाई गृहजिल्ला फर्कन भनेको हो । अधिकार सम्पन्न बागमती सभ्यता एकीकृत विकास समितिले लेखी पठाएका र विवरण अद्यावधिक गर्दा नेपालभर कतै जग्गा नभएको यकिन भएका २९ जनालाई फर्कन भनेको समितिले बताएको छ ।

Watch On

‘अधिकार सम्पन्न बागमती सभ्यता एकिकृत विकास समितिले संकलन गरेको डिजिटल विवरणका आधारमा प्रचलित कानुन बमोजिम भूमिहीन दलित, भूमिहीन सुकुम्बासी तथा अव्यवस्थित बसोबासीको व्यवस्थापनका लागि आवश्यक प्रक्रिया अगाडि बढाई दिन भनी लेखी आएकोमा सोको प्रयोजनका लागि त्यस्ता लाभग्राहीका परिवारको नेपाल राज्यभर घरजग्गा रहे नरहेको भनी भूमि व्यवस्थापन तथा अभिलेख विभागमा लेखी पठाएकोमा उल्लेखित लाभग्राही परिवारको नाममा घरजग्गा नभेटिएको भनी जवाफ प्राप्त भएकोले त्यस्ता लाभग्राहीहरुको स्थायी वतन उल्लेख भएको जिल्लामा स्वीकृत कार्यविधिको अधिनमा रही जग्गा उपलब्ध गराउने प्रयोजनार्थ, लाभग्राहीहरुको डिजिटल विवरण अनुसार तयार भएका निवेदन फारम र संलग्न कागजातहरू समेतको फाइल तयार गरी आवश्यक कारवाही अगाडी बढाउन सम्बन्धित जिल्ला समितिमा लेखी पठाइसकेको हुँदा सम्बन्धित जिल्ला समिति र पालिकामा यथाशीघ्र सम्पर्क गर्न जानु हुन सम्बन्धित सबैमा सूचित गरिन्छ,’ सूचनामा भनिएको छ ।

यसरी गृहजिल्लामा विवरण पठाएकामध्ये बनेपास्थित रेडक्रसम भवनको बस्दै आएका ९ सुकुम्बासी परिवार छन् ।

१४ परिवार कीर्तिपुरस्थित राधास्वामी सत्संगमा बस्ने छन् । नगरकोटको खानेपानी तालिम केन्द्रमा बस्दै आएका ५, कृषि तालिम केन्द्र बस्ने १ परिवार छन् ।