कार्यशैली फेर्दै प्रधानमन्त्री शाह, अब राजनीतिक भेटघाट पनि बढाउने

काठमाडौँ । प्रधानमन्त्री बालेन्द्र शाहले कार्यशैली परिवर्तन गर्दै लगेका छन् । सरकारको सुरुवाती सय दिनसम्म विरलै भेटघाट तथा छलफल गरेका प्रधानमन्त्री शाहले पछिल्लो समय सरोकारवालासँग भेटघाट तथा छलफल बढाएका छन् । पछिल्ला दिनमा उनले निजी क्षेत्रका प्रतिनिधिसँग निरन्तर भेटिरहेका छन् । त्यतिमात्रै होइन उनले राजनीतिक भेटघाटसमेत सुरुवात गरेका छन् । 

प्रधानमन्त्री शाहले असार २४ गते निजी क्षेत्रसँग, २५ गते निर्माण व्यवसायी, २६ गते उर्जा उत्पादक, ३० गते विश्वविद्यालयका उपकुलपतिहरु, ३१ गते होटल संघ, ३२ गते महिला उद्यमी, साउन १ गते जुत्ता उद्यमी, ४ गते पुँजी बजार र बीमा सरोकारवाला, ५ गते तयारी पोशाक संघ, ६ गते नेपाल हस्तकला महासंघलाई बोलाएर छलफल गरेका छन् । आज नेपाल अर्ग्यानिक संघका पदाधिकारी तथा व्यवसायीहरुसँग छलफल गर्दैछन् । 

Watch On

प्रधानमन्त्री शाहले असार ३२ मा राप्रपा अध्यक्ष राजेन्द्र लिङ्देनबाट राजनीतिक भेटघाट पनि सुरु गरिसकेका छन् । अब अन्य दलका नेताहरुसँग पनि भेट हुने प्रधानमन्त्रीका राजनीतिक सल्लाहकार असिम शाहले बताए ।

उनकाअनुसार प्रधानमन्त्री शाहले अब सरोकारवालासँग भेटघाट र सम्वाद बढाउँदै जानेछन् । 'सय दिनसम्म एउटा स्टाटेजी थियो । सय दिनपछि कार्यशैली फेरिँदै छ । स्टेक होल्डरको कुरा सुन्ने सम्वाद गर्ने अलि बढी हुन्छ,' शाहले भने,  'सय दिनको आफ्नो प्राथिमकता थियो । त्यो लक्ष्य भेट्टाउनुपर्ने थियो । बजेटको चाप थियो । यद्यपि आफ्नो तरिकाले भेटघाट भइरहेकै थियो । अब चाहिँ सम्माननीयज्यूले इनपर्सनमा आफ्नै चेम्बरमा सानो सानो ग्रुपलाई भेटेर अभिभावकको रुपमा गुनासो र सुझाव सुन्ने, सम्बोधन गर्नुहुन्छ ।' शाहकाअनुसार प्रधानमन्त्री कार्यालयमा निजी क्षेत्र समन्वय इकाइ गठन गरेर निजी क्षेत्रका प्रतिनिधिसँग डेढ दुई महिनामा नियमित बैठक गर्ने तयारी छ । 

सल्लाहकार शाहले अब राजनीतिक भेटघाटहरु पनि क्रमश हुने बताए । 'प्रधानमन्त्रीले नभेट्ने भन्ने होइन । आवश्यक पर्यो भने भेटिन्छ । राप्रपा अध्यक्षलाई बोलाएर भेट्नुभयो । अब अरु पोलिटिकल भेटघाट हुँदै गर्छ । नभेट्ने रणनीति नै छैन,' उनले भने, 'तीन महिना एउटा लयमा ल्याउनुथियो । चाप थियो । अब हामी बजेट कार्यान्वयनको क्रममा छौँ । मनोबल उच्च बनाउने कुराहरुमा गरी सम्माननीयज्यूले सुझाव गुनासोहरु सुन्ने गर्नुहुन्छ अभिभावकको रुपमा ।'

सल्लाहकार शाहले सरकार बजेट कार्यान्वयनलाई उच्च प्राथमिकतामा राखेर अगाडि बढिरहेको भन्दै अहिले मन्त्रिपरिषद् पुनर्गठन नहुने बताए । उनले अर्थमन्त्री र प्रधानमन्त्रीको सम्बन्ध एकदम सुमधुर रहेको र बजेट कार्यान्वयनमै केन्द्रीत रहेको बताए । 'मन्त्री कुनै हेरफेर हुँदैन । स्वर्णिम वाग्ले र प्रधानमन्त्रीबीच कुनै समस्या छैन,' उनले भने, 'सरकार बजेट कार्यान्वयनमा उच्च प्राथमिकतामा लागिरहेको छ ।' 

सल्लाहकार शाहले संघीय निजामती विधेयकमा कानुन मन्त्री सोविता गौतम र भूमिमन्त्री प्रतिभा रावलबीच कुनै मतभेद नरहेको र मन्त्रिपरिषदले विधेयकलाई टुंग्याउने प्रक्रिया रहेको बताए । 'कानुन मन्त्रालयको प्रक्रियागत कुराका लागि समय लागेको हो । विधेयकको कन्टेन्ट क्याविनेटले टुंग्याउने हो । सभापति र वरिष्ठ नेता सल्लाह भएर टुंगिन्छ । मन्त्रीहरुबीच टकराव भन्ने कुरा बकमफुसे हल्ला हो,' उनले भने ।  

प्रधानमन्त्रीका सल्लाहकार शाहले रास्वपामा मनोनीत पदाधिकारीको कुनै टुंगो नलगिसकेको बताए । उनले मनोनीतलाई लिएर सभापति र वरिष्ठ नेताबीच कुनै मतभेद नभएको र सल्लाहबाट सौहार्दरुपमा टुंगिने बताए । 'वरिष्ठ नेता र पार्टी सभापति बसेर विचार पुर्याएर मनोनीत गर्ने कुरा हो । उहाँहरुले बसेर टुंग्याएपछि केन्द्रीय समिति चाँडै बस्छ,' उनले भने ।