आफन्त र नातेदारलाई स्वकीय सचिव नियुक्त नगर्न सांसदहरुलाई रास्वपाको निर्देशन

काठमाडौँ । राष्ट्रिय स्वतन्त्र पार्टीले आफन्त र नातेदारलाई स्वकीय सचिव नियुक्त नगर्न आफ्ना सांसदलाई निर्देशन दिएको छ । 

महामन्त्री विपीन आचार्यले शुक्रबार जारी गरेको संघीय सांसदहरूको स्वकीय सचिव नियुक्ति तथा व्यवस्थापनसम्बन्धी आन्तरिक निर्देशनमा नातावाद र परिवारवादको पूर्ण निषेध गर्न भनिएको छ । 'स्वकीय सचिव नियुक्ति गर्दा पार्टीको विधान र सुशासनको मूल नीतिअनुरूप एकाघरका सदस्य वा नजिकका नातेदारहरूलाई पूर्ण रूपमा निषेध गरिएको छ। यो नियुक्ति पारिवारिक र नातागोताको परिधिभन्दा बाहिरबाट मात्र हुनुपर्नेछ,' निर्देशनमा भनिएको छ ।  

Watch On

सरकारले हालै कानुन संशोधन गरेर सांसदहरुले शाखा अधिकृत सरहको स्वकीय सचिव पाउने व्यवस्था गरेको छ । राज्यकोषबाट प्राप्त हुने यस सुविधाको उच्चतम सदुपयोगलाई सुनिश्चित गर्दै स्वकीय सचिव नियुक्ति प्रक्रियालाई पारदर्शी, मितव्ययी, र जनउत्तरदायी बनाउन रास्वपाले यो आन्तरिक निर्देशन जारी गरेको हो । 

रास्वपाले स्वकीय सचिवको शैक्षिक योग्यता स्नातक हुनुपर्ने पनि भनेको छ । 'उम्मेदवारले संघीय संसद् सचिवालयले तोकेको न्यूनतम शैक्षिक योग्यता (स्नातक तह वा सोसरह उत्तीर्ण) अनिवार्य रूपमा हासिल गरेको हुनुपर्नेछ। सम्बन्धित क्षेत्रमा विज्ञता, प्रविधिमैत्री क्षमता, अनुसन्धान कौशल र पार्टीको मूल्य–मान्यताप्रति निष्ठावान् व्यक्तिलाई प्राथमिकता दिनुपर्नेछ,' निर्देशनमा भनिएको छ । 

यसैगरी महिला, सीमान्तकृत समुदाय र पछाडि पारिएका वर्गलाई प्राथमिकता दिई समावेशितालाई प्रोत्साहन गर्न, स्वार्थ नबाझिएको र दोहोरो सुविधा नलिएको व्यक्ति छान्न निर्देशन दिइएको छ । 

रास्वपाले स्वकीय सचिवको छनोट सार्वजनिक आह्वान वा खुला प्रतिस्पर्धात्मक विधिबाट गरिनुपर्ने, नियुक्तिका लागि संसदीय दलबाट स्वीकृति लिनुपर्ने भनेको छ ।